Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə "Dialoq və İnkişaf Naminə” İctimai Birliyi (DİNİB) Tovuz şəhərində "Qərbi Azərbaycan-Qədim Yurd” layihəsi çərçivəsində növbəti tədbirini keçirib.
Əvvəlcə Azərbaycan Respublikasının dövlət himni səsləndirilib, Ulu Öndər Heydər Əliyevin və Vətən uğrunda canından keçən şəhidlərimizin əziz xatirəsi bir dəqiqəlik sükutla yad edilib.
Tədbiri giriş sözü ilə açan Tovuz Rayon İcra Hakimiyyətinin məsul işçisi Tofiq Əliyev bildirib ki, Qərbi Azərbaycan dedikdə hazırda Ermənistan Respublikasının ərazisində yerləşən və əsrlər boyu Azərbaycanlıların yaşadığı yurd yerləri- İrəvan, Göyçə və Zəngəzur nəzərdə tutulur. Qərbi Azərbaycan siyasəti Azərbaycanın dövlət suverenliyinə, ərazi bütövlüyünə zidd deyil. Əksinə bu bizim milli maraqlarımızla üst üstə düşür.
"Dialoq və İnkişaf Naminə” İctimai Birliyinin (DİNİB) sədri Çingiz Bayramov çıxış edərək bildirib ki, əzəli və əbədi dədə-baba yurdumuz olan Qərbi Azərbaycan azərbaycanlılar üçün sadəcə coğrafiya, torpaq deyil, həm də qədim türk yurdudur. Bu torpaqlar xalqımızın minillik tarixi, mədəniyyəti, folklorunun formalaşdığı yerdir. Ç.Bayramov sözlərinə davam edərək qeyd etdi ki, Azərbaycanın və onun Prezidenti İlham Əliyev dünya miqyasında misli görünməmiş dərəcədə artan nüfuzu, qərbi azərbaycanlıların öz tarixi torpaqlarına qayıtmaq, regionda sülhün bərpası prosesi güc tətbiq etməmək, sərhədlərin delimitasiyası, həmçinin kommunikasiya yollarının açılması kimi şərtləri özündə ehtiva edir.
Daha sonra çıxış etmək üçün söz Birliyin idarə heyətinin üzvü və layihınin eksperti Anar Əsədova verilib. Natiq qeyd edib ki, Azərbaycan xalqının tarixi yaddaşında və milli şüurunda əzəli yurd yerimiz olan Qərbi Azərbaycan torpaqlarının xatirəsi hər zaman yaşayır. İllərdir kimsəsiz qalan o torpaqlar indi Azərbaycanın iqtisadi atlasında mühüm yer tutmağa hazırdır. Bu torpaqlar təkcə qayıdışımızı yox, eyni zamanda dirçəlişi də gözləyir. Biz də xalq olaraq prosesi sürətləndirmək üçün ölkə başçısının ətrafında sıx birləşərək ona dəstək olmalıyıq.
Tədbirdə "Dialoq və İnkişaf Naminə” İctimai Birliyinin (DİNİB) Qazax – Gəncə regional nümayəndəsi Ceyhun Paşayev, Vətəndaş Həmrəyliyi Partiyası (VHP) Tovuz rayon təşkilatının sədri Nəsimi Ələsgərov, Nəsrəddin Tusi adına Tovuz şəhər tam orta məktəb-liseyin müəllimi İlqar Məmmədov Azərbaycan Vətən Müharibəsi Veteranları İctimai Birliyinin Tovuz rayon şöbəsinin sədri Etibar Vəliyev və "Mirvarid Dilbazi Poeziya Məclisi ” İctimai Birliyinin nümayəndəsi Birliyant Qurbanova çıxış edərək bildirdilər ki, Qərbi Azərbaycan İcmasının beynəlxalq hüquqa uyğun dinc təşəbbüsləri təqdirəlayiqdir və dünya ictimaiyyəti tərəfindən dəstəklənir. Qərbi azərbaycanlıların təhlükəsiz və ləyaqətli şəkildə, sülh yolu ilə Ermənistandakı dədə-baba torpaqlarına qayıdışının təmin edilməsi regionda sülhün, insan hüquqlarının və barışığın bərqərar olması üçün vacib şərtdir.
