Avropa sakinləri son onilliklərin ən möhtəşəm astronomik hadisələrindən birinə hazırlaşırlar. Artıq bu ilin yayında – 12 avqust 2026-cı il tarixində son 27 ildə ilk dəfə tam günəş tutulmasını izləmək mümkün olacaq.
Astronomlar Avropanın əksər bölgələrində bu tutulmanın qismən baş verəcəyini bildirirlər.
Məsələn, Parisdə Ay günəş diskinin 92%-dən çoxunu örtəcək. Lakin tutulmanın tam fəzasını yalnız İspaniyada görmək mümkün olacaq, çünki astronomik hadisənin əsas trayektoriyası məhz bu ölkənin üzərindən keçir.
Astronomların xüsusi diqqətini çəkən Altafulya kiçik bir orta əsrlər şəhəridir.
Kataloniya rəhbərliyi artıq bu məkanı tutulmanı izləmək üçün ən yaxşı 20 məkan siyahısına daxil edib. Hesablamalara görə, burada tam qaranlıq təxminən 55 saniyə davam edəcək.
Turistləri bu unikal səmada baş verəcək şoudan başqa, həm də şəhərin özünəməxsus ab-havası cəlb edir. Tarixi "Vila Klosa” mərkəzi dar daş döşənmiş küçələri, daş evləri və qədim tağları ilə orta əsrlər görkəmini qoruyub saxlayıb. XI əsrə aid qədim qəsr, San-Martin kilsəsi və sahilə yaxın yerləşən qədim Roma villası "Els Munts” şəhərin əsas görməli yerləri hesab olunur.
Ekspertlər tutulmanı görməyi planlaşdıran şəxslərə bura öncədən gəlməyi tövsiyə edirlər, çünki böyük turist axını gözlənilir.
Müşahidə üçün ən rahat nöqtələr kimi dəniz sahili və Sant-Antonio-de-Paduya kapellasının ətrafı göstərilir.
Bununla yanaşı, mütəxəssislər xəbərdarlıq edirlər ki, günəş tutulmasını yalnız xüsusi sertifikatlaşdırılmış qoruyucu eynəklərlə izləmək lazımdır. Müvafiq qoruyucu vasitə olmadan Günəşə qısa müddətli baxış belə, görmə qabiliyyətinin ciddi şəkildə zədələnməsinə səbəb ola bilər.
Beləliklə, bu yay Altafulya yalnız məşhur Aralıq dənizi kurortu kimi deyil, həm də Avropada nadir astronomik hadisəni izləmək üçün ən yaxşı məkanlardan biri kimi yadda qalacaq.
/musavat.com
