Uqandada 3 yaşında taxta çıxaraq Ginnesin Rekordlar Kitabına düşən Toro Krallığının hökmdarı IV Oyo Nyimba Kabamba İquru Rukidi 34 yaşında vəfat edib.
AZXEBER.COM xarici mətbuata istinadən xəbər verir ki, Uqandanın qərbində yerləşən ənənəvi Toro Krallığının lideri Kral Oyonun ölümünü krallığın Baş naziri Kalvin Armstronq Rvomiire Akiiki açıqlayıb.
Kral Oyo 1995-ci ildə, atası vəfat etdikdən sonra cəmi 3 yaşında taxta çıxıb. Bununla o, dünyanın ən gənc hökmranlıq edən ənənəvi lideri titulunu qazanıb.
Krallıq rəsmiləri onun ölümünün dəqiq səbəbini açıqlamayıb. Yerli mətbuat isə gənc kralın ağır xəstəlik səbəbindən ABŞ-da müalicə aldığını bildirib.
3 yaşında başlayan 31 illik hakimiyyət
XIX əsrin əvvəllərində yaradılan Toro Krallığının 13-cü hökmdarı olan Kral Oyo 2 milyondan çox insanın mədəni lideri hesab olunurdu.
Yaşının az olması səbəbilə Oyo 18 yaşına çatana qədər krallıq kraliça ananın da daxil olduğu qəyyumlar şurası tərəfindən idarə edilib. Yetkinlik yaşına çatdıqdan sonra isə rəsmi tacqoyma mərasimi keçirilib və o, krallığın idarəçiliyində tam səlahiyyət əldə edib.
Kral Oyo gənclərin inkişafı, təhsil, ətraf mühitin qorunması və HİV-lə bağlı maarifləndirmə layihələrinə dəstək verib.
Uqandada ənənəvi krallıqlar siyasi hakimiyyətə malik olmasa da, ölkə əhalisi arasında mühüm mədəni və sosial nüfuza sahibdir.
Kral Oyonun rəsmi nikahı olmasa da, krallığın Baş naziri taxtın davamlılığının təmin edildiyini açıqlayıb. Bildirilib ki, Kral Oyonun bir vəliəhd şahzadəsi var və yeni hökmdarın kimliyi krallığın ənənələrinə uyğun olaraq yaxın günlərdə açıqlanacaq.
Gülay
