İyunun 2-də Avstriyanın paytaxtı Vyana şəhərində ATƏT-in Demokratik Təsisatlar və İnsan Haqları Bürosu və ATƏT-in Finlandiya Sədrliyi tərəfindən "Tolerantlıq və diskriminasiya” mövzusunda iki günlük toplantı işə başlayıb.
57 ölkənin səfirləri, diplomatları və rəsmi nümayəndələrinin qatıldığı tədbirdə ATƏT məkanında vətəndaş cəmiyyətinin müdafiəsi, insan hüquqları müdafiəçilərinin fəaliyyəti, dinc toplaşma azadlığının təmin edilməsi və bu sahədə mövcud çağırışlar müzakirə olunub.
Toplantıda iştirak edən Azərbaycan Demokratiya və İnsan Haqları İnstitutunun rəhbəri, hüquq müdafiəçisi Əhməd Şahidov panel müzakirəsində çıxış edib və Ermənistan nümayəndələrinin Azərbaycan əleyhinə təxribatçı və revanşist çıxışlarına kəskin etirazını bildirib.
Çıxışında Əhməd Şahidov bildirib ki, tədbirdə iştirak edən erməni nümayəndələr tərəfindən Azərbaycan əleyhinə koordinasiyalı hücum həyata keçirilir. "30 il işğala məruz qalan ölkənin nümayəndəsi kimi, bu revanşist və nifrət dolu ritorikaları qətiyyətlə pisləyirəm” deyə o vurğulayıb.
Əhməd Şahidov çıxışında Ermənistanın işğalı dövründə Azərbaycanın üzləşdiyi ağır faciələri bir daha xatırladıb. O, Xocalı soyqırımı, Bağanis Ayrım qətliamı, Ağdaban faciəsi, həmçinin Qarabağda dağıdılan məscidlər və Ermənistanın bölgəyə basdırdığı yüz minlərlə minanın hələ də mülki əhaliyə təhlükə yaratması barədə məlumat verib.
Bütün bu ağır faciələrə baxmayaraq, Azərbaycan tərəfinin sülhə sadiqliyini nümayiş etdirdiyini vurğulayan Əhməd Şahidov, regionda uzunmüddətli sülh və sabitlik üçün Ermənistanla münasibətlərin normallaşdırılmasını və sülh müqaviləsinin imzalanmasını vacib saydığını qeyd edib.
"Bu gün də biz Ermənistana sülh və barış əlimizi uzadırıq. Burada nifrət və düşmənçilik yox, mehriban qonşuluq və qarşılıqlı hörmət mühiti yaratmağa çalışaq. Müharibələr heç kimə fayda gətirməyib, yalnız dialoq və əməkdaşlıqla bölgəmizdə sabit və təhlükəsiz gələcək qura bilərik”, — deyə Əhməd Şahidov çıxışında qeyd edib.
