'Elçibəy mənə dedi ki, onu zəhərləyiblər' - VIDEO

Dövlət xadiminin adı müstəqil Azərbaycanın tarixində bir çox hadisələrlə yadda qalıb. 12 il əvvəl avqustun 22-də Türkiyənin Gülhanə Hərbi Hospitalında vəfat edən Milli Azadlıq Hərəkatının lideri, Müstəqil Azərbaycanın ikinci prezidenti Əbülfəz Elçibəyin ölüm səbəbi son günlər aktuallaşıb. Belə ki, Müasir Müsavat Partiyasının sədri Hafiz Hacıyev mərhum prezidentin qəsdən zəhərlənməsi ilə bağlı Prokurorluğa etdiyi müraciət əsasında “Qəsdən adam öldürməyə cəhd” maddəsi ilə cinayət işi başlanıb.Hafiz Hacıyev məsələ ilə bağlı bunları deyib: “Dəfələrlə desəm də, bu məsələyə heç vaxt baxılmayıb. Ona görə ki, o vaxt eks-prezident məsələsinə baxılmırdı. Onun ölümü zəhərlənmə ilə bağlıdır. Bu birmənalıdır. Bunu Adil Minbaşı da telefon danışıqları zamanı demişdir”.Elçibəyin silahdaşları isə mərhum prezidentin ölümünə xəstəliyin səbəb olduğunu deyirlər. KXCP sədri Mirmahmud Fəttayevin sözlərinə görə, Elçibəyin dünyasını dəyişməsinin səbəbi ağciyər çatışmazlığı olub: “O, xərçəng idi. Zəhərlənməsi ilə bağlı məsələ yeni mövzu deyil. Bu gün gündəmə gətirilməsi başa düşülən deyil. Mən həkimlərə inanıram”.Elçibəyin yaxın dostu Adil Minbaşı isə ANS-ə bunları söyləyib: “Elçibəy xəstələnməmişdən 2 ay qabaq Türkiyədə yüksək səviyyədə tibbi müayinədən keçmişdir. Həkimlər onda heç bir xəstəlik aşkar etməmişdirlər. Əgər o, xəstə olsaydı, onu klinikadan buraxmazdılar, müalicə edərdilər. O, mənə demişdi ki, mən müayinədən keçmişəm heç bir xəstəliyim yoxdur, amma məni zəhərləyiblər. Onu kim zəhərlədiyini isə deməmişdir. Çünki, söhbətimizin sonuna başqa adamlar da gəldi və söhbətimiz yarımçıq qaldı. Bu söhbətdən sonra isə o müalicəyə getdi. Ondan sonra heç bir söhbətimiz olmayıb”.Qeyd edək ki, dövlət xadiminin adı Müstəqil Azərbaycanın tarixində bir çox hadisələrlə yadda qalıb. Onun ölkəyə rəhbərliyi dövründə Azərbaycanın ilk milli valyutası olan manat dövriyyəyə buraxılıb, ali təhsil müəssisələrinə qəbul imtahanlarında ilk dəfə test üsulu tətbiq edilib, ən əsası isə keçmiş Sovet respublikaları arasında birinci olaraq Rusiya qoşunları Azərbaycandan çıxarılıb.