İcra başçısı Əhəd Abıyev MTN-də Akif Çovdarovla dalaşıb, nazir gecəyarı işə qayıdıb İcra başçısı: “Yüzlərlə məmur tanıyıram ki, bunlar “vurulanda” qurban kəsdilər”
Sabiq Milli Təhlükəsizlik Nazirliyinin Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarovla icra başçısı Əhəd Abıyev arasında iki il əvvəl insident yaşanıb. Bunu icra başçısının özü də Gününsəsi.info-ya açıqlamasında təsdiqləyib. Belə ki, iki il əvvəl Daşkəsən rayonunun Qabaqtəpə kəndində körpü tikintisi aparan iş adamı və onun mühasibi bankdan pul çıxararkən, MTN maskalılarının hücumuna məruz qalıb.
Onların başına torba keçirərək Akif Çovdarovun kabinetinə aparıblar. Bundan xəbər tutan Daşkəsən rayon icra hakimiyyətinin başçısı Əhəd Abıyev MTN-ə gedərək, Akif Çovdarova qanunsuz əməllərinə görə sərt etiraz edib. Generalla mübahisəyə girən Əhəd Abıyev saxlanılan şəxslər azad edilməyəcəyi təqdirdə, ölkə başçısına şikayət edəcəyini deyib. Akif Çovdarovun Əhəd Abıyevi həbslə hədələməsi isə qalmaqalın böyüməsinə səbəb olub. Əsəblərini cilovlaya bilməyən icra başçısı generalı ağır sözlərlə təhqir edib. Gecə saatlarında iş yerinə qayıdan keçmiş nazir Eldar Mahmudov icra başçısını kabinetinə dəvət edib, onu sakitləşdirməyə çalışıb. Bundan sonra tutulanlar sərbəst buraxılıb.
Əhəd Abıyev belə bir olayın yaşadığını təsdiqləyib: “Akif Çovdarov mənə deyirdi ki, bir neçə ildir icra başçısısan, amma bir dəfə də olsun gəlib, bizi “görməmisən”. Mən ona ağzıma gələni dedim, İnsanların balası var, küçədən oğurlayıb, ona işgəncə vermişdilər. Hələ Eldar Mahmudov mənə deyir ki, bura sənə Milli Məclis deyil. Dedim, sizin əməlləriniz insanı özündən çıxarır. Onu MTN-dən aparanda tanınmaz halda idi. Eldar Mahmudov və dəstəsi millətin bəlasına çevrilmişdi. Mən yüzlərlə məmur tanıyıram ki, bunlar “vurulanda” qurban kəsdilər”- deyə icra başısı bildirib.
Ötən ilin sonlarında MTN ətrafında baş verən hadisələrdən sonra, bu qurumdakı bir çox vəzifəli şəxslə yanaşı, Akif Çovdarov da həbs edilib. A.Çovdarova vəzifə səlahiyyətlərindən sui-istifadə, rüşvət alma, qanunsuz azadlıqdan məhrum etmə və digər maddələr üzrə ittiham irəli sürülərək barəsində həbs-qətimkan tədbiri seçilib. Onun adı bir çox ağır cinayətlərdə hallanır.
///Bizimyol.info
