Bakıda marşrut avtobusları ilə bağlı bir çox sərnişinin şikayətçi olduğu məlumdur. Növbəti şikayət məktubu AZXEBER.COM-un redaksiyasına göndərilib. Rəsul adlı oxucumuz “88” nömrəli marşrut avtobusundan narazılığını bildirib:
“Mən hər gün 88 saylı maşrut avtobusundan istifadə edirəm. Hər gün bu avtobuslarda ürəyim ağzımda, qorxa-qorxa gedib-gəlməyə məcburam. Elə bil avtobusda deyil, hansısa qırıcı raketin üstündə gedirik. Sərnişinlər öz iradlarını sürücülərə deyəndə isə ən yaxşı halda bizə əhəmiyyət vermirlər. Digər hallarda isə, ya sərnişinlər təhqir olunur ya da “get kimə deyirsən de” ifadələri ilə qarşılaşırıq.
Tələbəyəm və universitetə getmək üçün də “88” nömrəli marşrutdan istifadə edirəm. Lakin dəfələrlə olub ki, bu avtobusun sürücülərinin məsuliyyətsizliyi ucbatından dərsə gecikmişəm. Çünki bu avtobusun sürücüsü tələsəndə, dayanacaqda avtobusu saxlamadan sürüb gedir.
Hələ mən 88 saylı avtobusun sürücülərinin dayanacaqlarda dayanıb öz dostları ilə dəqiqələrlə söhbət eləməsini demirəm. Xahiş edirəm məsələylə bağlı araşdırma aparasınız”.
Məsələ ilə bağlı “88” nömrəli marşrutun tabe olduğu “Çinar Trans MMC”nin direktoru Etibar Manafovla əlaqə saxladıq. E. Manafov AZXEBER.COM-a açıqlamasında xoşagəlməz hallarla bağlı ölçü götürüləcəyini bildirdi:
“Ümumiyyətlə, bizim şirkətin tabeliyində olan marşrut xətləriylə bağlı hər zaman reydlər keçirilir. Bütün şikayətlər şirkət rəhbərliyinin iştirakı ilə keçirilən iclaslarda müzakirə olunur. Konkret şikayətlərə gəldikdə isə, şikayət edilən sürücünün adı və ya avtobusun nömrəsi dəqiq bildirilsəydi, birbaşa onunla əlaqə saxlayardıq. Ancaq yenə də “88” nömrəli marşrutdan gələn bu şikayəti nəzərə alacağıq. Əslində, avtobusların daha çox dayanacaqdan kənarda maşını saxlamaqla qanunu pozmasının şahidi oluruq. Dayanacaqda saxlamayıb sürmək halına isə az-az rast gəlinir.”
Etibar Manafov avtobus sürücülərinin nizam-intizamına nəzarət olunduğunu bildirdi:
“Sürücülərimiz geyim formasından tutmuş sərnişinlərlə davranışa qədər bütün kriteriyalara cavab verirlər. Onlara avtobusda siqaret çəkmək, telefonla danışmaq qadağandır. Hər hansı şikayət olduqda isə, bununla bağlı araşdırma aparırıq. Düzü, “Qaynar xətt”imiz yoxdur, çünki MMC olduğumuz üçün buna ixtiyarımız yoxdur. Amma bunun üçün Nəqliyyat Departamentinin “qaynar xətti”nə müraciət etmək olar”.
