AXCP sədri Əli Kərimlinin 8,5 milyon dollar vəsaitinin olması haqqında mətbuatda yayılanlar birmənalı qarşılanmadı.
Xüsusilə sosial şəbəkələrdə müzakirə mövzusu olan bu məsələ ətrafında cəbhəçilər bir tərəfdə, digərləri, daha çox da müsavatçılar bir tərəfdə yer alaraq müzakirələr açdı. Ə. Kərimlini müdafiə edən cəbhəçilər arasında tərəddüd edənlər də var. Belə ki, AXCP-nin gənc fəallarından olan Vüqar Qurdqanlı “Facebook” səhifəsində bunu Ə.Kərimliyə qarşı təxribat olduğunu yazıb. Lakin onu da qeyd edib ki, əgər bu sübut olunsa Ə.Kərimli partiya sədrliyindən və partiyadan istefa verməlidir.
“Bir cəbhəçi kimi AXCP sədrindən və partiyamızın mətbuat xidmətindən bu yazı barədə açıqlama gözləyirəm! Əgər yazılanlar həqiqətdirsə, Əli bəy istefa verməlidir!”-deyə gənc cəbhəçi tələb edib.
