Xəbər verdiyimiz kimi, Azərbaycanda fəaliyyət göstərən 23 siyasi partiya lideri Prezident İlham Əliyevə təbrik məktubu göndəriblər.
Təbrik məktubunda deyilir:
"Partiyalarımız dövlətimizin əbədi suverenliyi üçün apardığınız uğurlu daxili və xarici siyasətdə Zati-alinizə dəstəyini bəyan edir".
Lakin təbrik göndərən müxalif partiyaların içərisində "Müsavat" və "Azərbaycan Xalq Cəbhəsi" görünməyib.
Partiyaların Prezidentə təbriki ilə bağlı AZXEBER.COM-a açıqlama verən Milli Məclisin deputatı Hikmət Babaoğlu bildirib ki, bu çox əhəmiyyətli bir hadisədir:
"Azərbaycan 19-20 sentyabr tarixində antiterror tədbirləri keçirməklə müstəqil dövlətimizin hər qarış ərazisində öz suveren hüquqlarını, konstitusiya quruluşunu bərpa etdi. Bu, çox böyük tarixi hadisədir və bununla əlaqədar Azərbaycan xalqının hər bir fərdi - müxalifət partiyaları, qeyri-hökumət təşkilatları, vətəndaş cəmiyyəti nümayəndələri, əlbəttə ki, bu tarixi hadisəylə bağlı Azərbaycan Prezidenti cənab İlham Əliyevi təbrik edir. Çünki bu ümumxalq əhəmiyyətli bir hadisədir. Biz dövlətçilik tariximizin yeni qürur səhifəsini yaratdıq. Son yüz ildə ilk dəfədir ki, Azərbaycan Bayrağı Xankəndi üzərində dalğalanır. Belə olan halda siyasi sistemimizin daxili aktorları müxalifət partiyalarının da Azərbaycan Prezidentinə ünvanladıqları təbrik məktubları və bəyanatlarında tamamilə yerindədir. Ancaq çox təəssüf ki, bəzi partiyalar, məsələn, Əli Kərimlinin sədri olduğu "Azərbaycan Xalq Cəbhəsi" partiyası, özünü ümumxalq sevincindən, qürurundan kənar tutur. Bu əslində həmin partiyanın özünü Azərbaycanın siyasi sistemindən kənarda tutması deməkdir".
Deputat hesab edir ki, Əli Kərimli və partiyası Azərbaycanın siyasi sistemindən getməlidir:
"Şübhəsiz ki, belə olduqda xalq da həmin siyasi partiyanı qəbul etmir, onun sevincinə şərik ola bilməyənləri seçkidə cəzalandırır və nəticədə həmin partiyalar Azərbaycan xalqının səsini və rəğbətini qazana bilmir. Ona görə də düşünürəm ki, kim bu tarixi hadisələrdə xalqın yanında ola bilmirsə, sabah xalqdan səs də istəyə bilməyəcək. Bu səbəbdən "Azərbaycan Xalq Cəbhəsi"nin sədri Əli Kərimli də, zəfər tariximizə xalqımızla birgə ortaq mövqe sərgiləməyənlərin hər biri də Azərbaycanın siyasi sistemindən getməlidirlər. İstefa verməlidirlər ki, müstəqil dövlətçilik tariximizin yeni inkişaf mərhələsində ölkəmizdə daha sağlam, xalqımızın məqsədlərini etibarlı şəkildə təmsil edə biləcək yeni siyasi sistem formalaşsın. Çünki biz "Müsavat", "Azərbaycan Xalq Cəbhəsi" partiyalarının timsalında siyasi sistemimizin önündə tormozlayıcı funksiya yerinə yetirən vasitə görürük. Buna görə də dövlətçilik tariximizin indiki inkişaf mərhələsində "tormozlayıcı faktorlar" bizi milli inkişafdan geridə qoyurlar".
Mikayıl Mirzəzadə
