Azərbaycanın işğal altında olan Qarabağ bölgəsinə Azərbaycanın rəsmi icazəsi olmadan qanunsuz səfər edən şəxslərlə bağlı Azərbaycan hakimiyyətinin, eləcə də Xarici İşlər Nazirliyinin mövqeyi ortadadır.
Bununla bağlı məsələyə rəsmi şəkildə münasibət bildirilib. AZXEBER.COMxəbər verir ki, bunu avqustun 30-da jurnalistlərlə söhbətində Prezident Administrasiyasının (PA) Siyasi təhlil və informasiya təminatı şöbəsinin müdiriElnur Aslanovbildirib. Onun qeyd etdiyinə görə, Azərbaycanın işğal olunmuş bölgələrinə qanunsuz səfər edən şəxslər XİN tərəfindən müvafiq siyahıya daxil edilib və onlar arzuolunmaz şəxs elan ediliblər. PA rəsmisi deyib ki, bununla belə işğal olunmuş ərazilərə qanunsuz səfər edən şəxslərin böyük əksəriyyəti daha çox aşağı səviyyəli, qalmaqal dalınca qaçan və öz şəxsi maraqlarını həyata keçirtməyə çalışan insanlardır: “Onlar daha çox merkantil maraqlardan çıxış edən insanlardır. Əslində həmin adamların bu addımları bizi o qədər də narahat etmir. Çünki onların səfərləri nə Qarabağın tanınması, nə də bu məsələnin başqa arzuolunmaz formada həllinə rəvac vermir. Ancaq bizi burada narahat edən məqam odur ki, həmin şəxslərin təmsil etdikləri dövlətlər onlara qadağalar qoymalıdır. Lakin çox təəssüflər olsun bunu etmirlər. Bizim həmin dövlətlərlə münasibətlərimiz var və bu adamların addımları Azərbaycanla həmin dövlətlər arasında müəyyən qədər problemlərin yaranmasına səbəb ola bilər. Bununla belə bütövlükdə götürüləndə bu qanunsuz səfərləri edənlər daha çox öz maraqlarını həyata keçirtməyə çalışan, qalmaqal dalınca qaçan, aşağı səviyyəli insanlardır”.
