İstənilən Azərbaycan vətəndaşı harasa səfər edə bilər.

Yəni, hər hansı bir şəxsin bu və ya digər ölkəyə turistik səfəri çox normal bir haldır. Bunu avqustun 30-da jurnalistlərlə söhbətində AZXEBER.COM müxbirinin Milli Şura rəhbərliyinin Londona nəzərdə tutulan səfəri ilə bağlı sualını cavablandıran Prezident Administrasiyasının (PA) Siyasi təhlil və informasiya təminatı şöbəsinin müdiri Elnur Aslanov dilə gətirib. PA rəsmisinin sözlərinə görə, istər müxalifət partiyaları olsun, istər digər siyasi partiyalar olsun, onların təmsilçiləri də müxtəlif ölkələrə səfər edə, orada görüşlər keçirə, müzakirələr apara bilərlər: “Bu çox normal bir məsələdir. Azərbaycanda da hazırda seçki ab-havası çox sivil və demokratik şərtlərlə təmin olunmaqdadır. Yəni, bu baxımdan istənilən şəxslərin turistik səfərləri normal qarşılanır. Amma kiminsə kiməsə dəstəyi məsələsinə gəlincə, qeyd etməliyəm ki, sadəcə son bir neçə ay ərzində Azərbaycan prezidentinin xarici ölkələrin yüksək səviyyəli nümayəndə heyətləri, dövlət başçıları ilə görüşləri, bu görüşlər zamanı imzalanan sənədlərə baxmaq kifayətdir ki, Azərbaycanda həyata keçirilən siyasətə, sosial-iqtisadi inkişafa, Azərbaycanı ortaya qoyduğu siyasi iradəyə hansı və necə formada dəstək verilir”.