Elnur Aslanov: 'Vətəni qorudunsa, sənindir - qorumadınsa, göz dağındır'
Bütün Xəbərlər
13:33 06.05.2012
1535
Xəbər verdiyimiz kimi, dünən Heydər Əliyev sarayında “İrəli” İctimai Birliyinin hesabat-seçki konfransı keçirilib. Tədbirdə çıxış edən Prezident Administrasiyasının Siyasi təhlil və informasiya təminatı şöbəsinin müdiri Elnur Aslanov “İrəli”nin demokratik qaydalara riayət etməklə geniş ictimaiyyət qarşısında hesabat-seçki konfransı keçirməsini gənclər təşkilatlarının tarixində yadda qalan hadisə kimi xarakterizə edib. E.Aslanov gənclərə xitabən deyib ki, bu gün həmin tədbirdə iştirak edən gənc nəslin nümayəndələri Cavanşirin, Tomrisin, Fətəli xan Xoyskinin, Əli bəy Hüseynzadənin, Məhəmməd Əmin Rəsulzadənin, Heydər Əliyevin övladlarıdır. A.Aslanov qeyd edib ki, bu günün gəncləri Azərbaycanı parlaq gələcəyə aparan qüvvədir və Azərbaycan dövlətinin də məqsədi təşəbbüskar və vətənpərvər gəncliyin formalaşmasıdır. E.Aslanov çıxışında gənclərin işlə təminatı sahəsində həyata keçirilən layihələr, Azərbaycanın regiondakı rolu və çəkisi, o cümlədən Dağlıq Qarabağ münaqişəsi, Ermənistanın təcavüzkar niyyəti haqqında da danışıb: “Bu gün əsas problemimiz Dağlıq Qarabağdır. Ermənistanla müharibə şəraitində yaşamağımıza baxmayaraq, Azərbaycanda 30 min erməni var. Çünki yaradılanı sevirik, Azərbaycan yaradılanlar vətənidir. Ancaq danışıqlar prosesi torpaqlarımızın işğaldan azad edilməsi ilə yekunlaşmasa, hər birimiz Ali Baş Komandanın əmri ilə torpaqlarımız uğrunda vuruşan əsgərlərik. Çünki vətəni qorudunsa, sənindir - qorumadınsa, göz dağındır”.
