Prezident İlham Əliyevin avqustun 16-da imzaladığı sərəncamla Cənubi Afrika Respublikasına (CAR) səfir təyin olunmuş Elxan Poluxov Xarici İşlər Nazirliyinin (XİN) mətbuat katibi postundan rəsmən ayrılıb. Avqustun 25-də bu barədə yazılı açıqlama yayan E.Poluxov həyatının, demək olar, son 10 ilinin mətbuat və mətbuat işçiləri ilə bağlı olduğunu bildirib: «Buna görə də mən jurnalistləri həmişə həmkar hesab etmişəm və bununla fərəhlənirəm. Cənab prezidentin mənə etimad göstərib səfir təyin etməsi, fövqəladə və səlahiyyətli səfir rütbəsi verməsi mənim üçün çox şərəflidir. Ümid edirəm ki, bu etimadı doğrulda biləcəm. Bu məsələdə sözsüz ki, yenə də jurnalistlərin köməyinə umid edirəm. CAR nə qədər uzaq olsa da, bir o qədər də yaxındir».
XİN-in mətbuat katibi vəzifəsinin müvəqqəti icraçısı Elman Abdullayevi təqdim edən E.Poluxov deyib: «Peşəkar, gənc, sözün yaxşı mənasında iddialı diplomat olan Elman Abdullayev həm də yüksək insani keyfiyyətlərə malikdir. Əminəm ki, əməkdaşlığınız uğurlu və qarşılıqlı qaydada faydalı olacaq».
E.Poluxov hələ bir müddət, sentyabr-oktyabr aylarında texniki məsələləri həll etmək üçün Bakıda olacağını, sonra CAR-a yollanacağını əlavə edib.
Merkez.az xatırladır ki, E.Poluxov XİN-in mətbuat xidmətinin rəhbəri vəzifəsini 2009-cu ilin martından müvəqqəti icra etməyə başlayıb. 2010-cu ilin yanvarın 1-dən isə mətbuat xidmətinin rəhbəri idi.
