"Araz-Naxçıvan" klubu futzal üzrə UEFA Çempionlar Liqasının əsas mərhələsində ikinci oyununu keçirib.
AZXEBER.COM-un məlumatına görə, B yolunda yer alan Joze Alesio Da Silvanın baş məşqçi olduğu kollektiv 6-cı qrupdakı növbəti sınağında Rumıniyanın "Yunayted Qalati" komandası ilə üz-üzə gəlib.
Ukraynanın İvano-Frankovsk şəhərindəki Peşəkar Bədən Tərbiyə Kollecinin zalında oynanılan qarşılaşma Azərbaycan təmsilçisinin 5:3 hesablı qələbəsi ilə yekunlaşıb.
"Araz-Naxçıvan"ın qollarını David Qustavo (2), Maneka, Murilo Borges və Felipinyo, "Yunayted Qalati"nin hər üç qolunu isə Daniel Araujo vurub. 35-ci dəqiqədə rəqibin heyətində Octavian Cires qırmızı vərəqə alıb.
İlk görüşdə Ukrayna "Uraqan"ına 1:2 hesabı ilə uduzan Azərbaycan təmsilçisi üçüncü maçtını oktyabrın 31-də Kosovonun "Ligeni" komandasına qarşı keçirəcək.
Çempionlar Liqası, əsas mərhələ
B yolu, 6-cı qrup
II tur
"Araz-Naxçıvan" (Azərbaycan) - "Yunayted Qalati" (Rumıniya) - 5:3
Qollar: David Qustavo, 3:30; 35:38. Maneka, 5:20. Murilo Borges, 19:43; Felipinyo, 36:50 - Daniel Araujo, 6:58; 16:48; 36:37
Baş hakim: Deyan Veseliç (Sloveniya)
İvano-Frankovsk, Peşəkar Bədən Tərbiyə Kollecinin zalı.
Qeyd edək ki, 6-cı qrupun oyunları Ukraynada keçirilir. Bu qrupun digər matçında "Uraqan" və "Ligeni" komandaları üz-üzə gələcək. Qarşılaşma Bakı vaxtı ilə saat 20:00-da başlayacaq.
