Səbuhi Abbasov: “Ən böyük cinayətkar dövlətin milli maraqlarının satandır”
Azərbaycan-Slavyan Gəncləri Assosiasiyası bəyanat yayıb.Assosiasiyasının sədri Səbuhi Abbasovun AZXEBER.COM-a təqdim etdiyi bəyənatda deyilir:
“Hörmətli həmkarlar, dəyərli vətəndaş cəmiyyətinin nümayəndələri!
Azərbaycan-Slavyan Gəncləri Assosiasiyası İctimai birliyi olaraq 6 avqust 2014-cü il tarixində Şərq Tərəfdaşlığı Vətəndaş Forumu tərəfindən “Azərbaycanda tanınmış vətəndaş cəmiyyəti liderlərinin həbsi” barədə yaydığı bəyanatı birmənalı pisləyirik.1918-ci ildə Şərqdə ilk demokratik cümhuriyyətin varisi elan edən müstəqil Azərbaycan Respublikası hüquqi dövlət prinsiplərinə sadiqliyini həmişə nümayiş etdirmişdir. Təəssüflər olsun ki, ölkəmizin inkişafını istəməyən, Azərbaycanın regionda əsas söz sahibi olaraq böyük və barışılması zəruri olan gücə çevrilməsindən narahat olan bəzi beynəlxalq təşkilatlar ölkəmizin imicinə kölgə salmaqla qısqanc münasibətlərini bu formada ifadə edirlər.Biz birmənalı olaraq ölkəmizdə hansısa bir vətəndaş cəmiyyəti liderinin həbsini siyasi sifariş hesab etməyin əleyhinəyik. Ölkəmizdə vətəndaş cəmiyyətinin inkişafı istiqamətində kifayət qədər uğurlar var və zaman-zaman bu sahədə hüquqi islahatlar həyata keçirilir. Həbs olunan vətəndaş cəmiyyəti nümayəndələrinin əməlində konkret cinayət tərkibinin olması səbəbindən saxlanılmaları hüquq mühafizə orqanları tərəfindən bəyan edilmiş və qanunun tələbi ilə məsələlərə aydınlıq gətirilmişdir. Bir neçə şəxs barəsində isə istintaq hərəkətləri davam etdirilir.Sual olunur: əgər hər hansı Avropa dövlətində şəxs və ya şəxslər tərəfindən və ya hansısa qeyri-hökumət təşkilatı tərəfindən qanunun tələbi pozulursa o zaman hansı addımlar atılır?Amerika Birləşmiş Ştatlarında son günlərdə baş verən hadisələr bir daha onu göstərdi ki, hər kəs demokratiyaya öz pəncərəsindən baxır. Və özlərini demokratiya, hüquq müdafiəçisi carçısı kimi təqdim edənlər niyə bu və ya bu kimi hadisələrə münasibət bildirmirlər. Düşünürəm cavab qısa və konkretdir: qrant! Bu mövzu üzərində çox müzakirələr aparmaq olar. Bəlli olan odur ki, ən böyük cinayətkar dövlətin milli maraqlarının satandır. Bu cinayəti törədənlərin yeri isə məhbəsdir.”
