"Türkiyənin baş naziri Rəcəb Tayyib Ərdoğan Fransa parlamentində qondarma “erməni soyqırımı”nın inkar edilməsinin cinayət sayılmasını nəzərdə tutan qanun layihəsini qəbul edilməsindən sonra öz ölkəsinin atacağı addımları açıqlayıb.
Ərdoğan Fransadakı səfirin geri çağırıldığını, Fransa ilə bütün ikili iş birliklərinin ləğv olunduğunu, Avropa Birliyi çərçivəsində bütün müzakirələri dondurulduğunu, bütün siyasi əlaqələrin ləğv olunduğunu, hərbi uçuşlar üçün verilən icazələrin ləğv olunduğunu, gəmilərin türk limanlarına daxil olmasına qadağa qoyulduğunu bəyan edib.
Ərdoğan həmçinin qeyd edib ki, Fransada söz, fikir azadlığı yoxdur: "Hamınızdan soruşuram "Fransada söz azadlığı varmı?" Cavabını özüm verirəm "xeyr, yoxdur". Dost, düşmən bilsin ki, biz tariximizlə qürur duyuruq. Bizim qaranlıq keçmişimiz yoxdur. Onu da bilin ki, tarix parlamentlərdə yazılmır. Tarixi təhrif edənləri tarix də, xalqlar da bağışlamayacaq"
T.Ərdoğan həmçinin qeyd edib ki, fransızların Afrika xalqlarına qarşı törətdiyi qətliamları bütün dünyaya qəbul etdirməyə çalışacaqlar.
