Xəbər verdiyimiz kimi, müğənni Elvin Babazadənin "Sənə varam!" adlı bəstəsi ermənilər tərəfindən oğurlanıb. Mahnını ifa edən erməni müğənni Anuş Petrosyan onu öz mahnısı kimi təqdim edib, hətta klip də çəkdirib.
Məsələ ilə bağlı AZXEBER.COM-a açıqlama verən Elvin Babazadə bundan yeni xəbərdar olduğunu deyib.
Elvin bir çox ölkələrdə mahnılarının oxunduğunu desə də, erməni müğənninin belə addımı ilə ilk dəfə qarşılaşdığını da gizlətməyib:
"Mən də məsələdən yeni xəbər tutmuşam. Normalda mahnılarım hər zaman başqa millətlər tərəfindən ifa olunur. Elə "Nəyi var" mahnım Özbəkistanda, Türkmənistanda oxunub, "Əzizim ana" mahnım da həmçinin. Amma bu mahnımın oxunduğunu bilmirdim, xüsusən də erməni müğənni tərəfindən. Bu işlə bağlı mahnının bəstəkarı ilə əlaqə saxlamağa çalışıram".
O, hüquqi yollara baş vuraraq, lazım olan bütün addımları atacağını bildirib:
"Mahnının bəstəkarı israilli musiqiçidir. Mən mahnını ondan götürmüşəm. İlk öncə onunla danışmalıyam. Görək bu müğənni mahnını hansı haqla oxuyur, bəstəkarın izni varmı? Əslində, bəstəkarın buna haqqı var. Amma mən düşünmürəm o buna icazə verib. Bütün bunları araşdırandan sonra məlum olsa ki, bəstəkardan və məndən icazə almadan ifa olunub, şikayətimizi bildirərək müvafiq yollarla bu işi həll edəcəyik".
Aysel Hacızadə
