"Ermənistanın belə təxribatlara əl atmasının əsas hədəfi sülh razılaşmasının şərtlərinin deyil, atəşkəs məsələsinin gündəliyə çıxarılmasıdır”
Bu sözləri AZXEBER.COM-a açıqlamasında politoloq Anar Əliyev deyib.
"Mayın 1-dən 4-nə qədər Azərbaycan və Ermənstan xarici işlər nazirləri arasında sülh müqaviləsinin imzalanması istiqamətində müzakirələr həyata keçirildi. Azərbaycan xarici işlər naziri Ceyhun Bayramovun açıqlamasına və ABŞ mətbuatının yazdığına görə bir sıra məsələlərdə müəyyən qədər irəliləyişlər əldə olundu. Vaşinqton danışıqlarında bir addım da irəliyə gedildi. Ancaq çox təəssüf ki, bu danışıqlardan qısa bir müddət sonra Ermənistan tərəf növbəti təxribatlar törətməklə münasibətləri gərginləşdirmək və əldə olunan razılaşmaları sıfırlamağa çalışır. Bu təsadüfi deyil. Bu günə qədər əldə olunmuş razılaşmalardan sonra Ermənistan üzərinə götürdüyü öhdəlikləri yerinə yetirmək əvəzinə münasibətlərdə gərginliklər, öhdəliklərdən yayınma imkanı formalaşdırmağa çalışır. Biz bunu bir neçə dəfə müşahidə etmişik”.
Anar Əliyev 2022-ci il 31 avqust tarixli Brüssel görüşünü xatırladaraq, Ermənistanla Azərbaycan arasında çox ciddi müzakirələr və bu müzakirələr nəticəsində uğurlu gedişlər əldə olunduğunu söyləyib:
"Ermənistana üzərinə götürdüyü öhdəliklərlə bağlı vaxt məhdudiyyəti qoyulmuşdu.
Bu vaxt məhdudiyyəti çərçivəsində Ermənistanla Azərbaycan xarici işlər nazirləri arasında görüş keçirilməli və ilkin razılıq mətni razılaşdırılmalı idi.
Təəssüf ki, həmin görüşdən qısa bir müddət sonra 12-13 sentyabr Ermənistan tərəfindən təxribatlar törədildi. Sülh gündəliyi sıfırlanmış oldu. Bu görüşdən sonra da 14 may liderlər arasında planlaşdırılan görüş ərəfəsində Ermənistanın belə təxribatlara əl atmasının əsas hədəfi sülh razılaşmasının şərtlərinin deyil, atəşkəs məsələsinin gündəliyə çıxarılmasıdır. Bununla da Ermənistan tərəfi və Ermənistanın havadarları prosesləri bir qədər də uzatmağa çalışırlar”.
Politoloq bildirib ki, Ermənistanın əsas hədəfi Türkiyədə 14-may tarixində keçiriləcək seçkilərin nəticəsində onların ümid etdiyi hakimiyyət dəyişikliyinin baş tutmasıdır:
"Ermənistan hesab edir ki, 14-maydan sonra Türkiyədə hakimiyyət dəyişikliyi baş verəcək.
Onların tapşırığı əsasında davranışlar nümayiş etdirən komanda hakimiyyətə gələcək. Bundan sonra Türkiyənin Azərbayacana dəstəyi açıq şəkildə zəifləmiş olacaq. Türkiyədən açıq dəstək ala bilməyən Azərbaycana daha böyük təzyiqlər etməklə, Ermənistanın və havadarlarının maraqlarına uyğun razılaşmalar əldə oluna biləcək. Hesab edirəm ki, başlıca hədəf bundan ibarətdir. Ona görə də mümkün qədər prosesləri uzatmaq üçün belə təxribatlar əl atırlar. Ermənistanın belə təxribatlara getməsi onu gösətirir ki, məqsəd böyükdür. Bu məqsədlər təəssüf ki, bölgə xalqlarının, Ermənistan xalqının belə gələcək maraqlarına xidmət etmir”.
Şəbnəm Zahir
