Avropa İttifaqı Şurasının Prezidentinin təşkilatçılığı ilə Azərbaycan Prezidenti İlham Əliyev və Ermənistanın baş naziri Nikol Paşinyan arasında Brüsseldə 14 may tarixli sayca beşinci görüşü keçirilib.
"Brüsseldə baş tutan üçtərəfli görüş Azərbaycan diplomatiyasının növbəti uğuru kimi dəyərləndirilməlidir. Çünki bu görüşdən sonra verilmiş bəyanatdan belə bir nəticəyə gəlmək olur ki, Azərbaycan və Ermənistan bir-birinin ərazi bütövlüyünü tanıdığını təsdiqləyir. Bu isə o deməkdir ki, Ermənistan Azərbaycana ərazi iddialarından əl çəkir. Azərbaycan ərazilərində yaşayan ermənilərin məskunlaşdığı ərazilərə dair heç bir statusla bağlı istəkləri və iddiaları yoxdur. Bununla yanaşı verilmiş bəyanatlarda "Dağlıq Qarabağ” sözünün keçməməsi, Laçın yolunda qurulan nəzarət-keçid məntəqəsi ilə bağlı heç bir cümlənin olmaması o deməkdir ki, ermənilərin bu məsələlərlə bağlı artıq iddiaları yoxdur. Azərbaycanın suverən məsələlərinə qarışmırlar. Avropa İttifaqı da bunu anlayır.
Deputat deyib ki, Fransa Brüssel görüşünə maneə olmaq istəyib:
"Brüssel görüşünün yenidən bərpa edilməsi, üçtərəfli görüşün Şarl Mişelin moderatorluğu ilə keçirilməsi faktiki olaraq Fransanın bu proseslərdən kənarda qalması deməkdir. Fransa Brüssel formatına müdaxilə edərək, bu formatda görüşlərin keçirilməsinə maneələr törədirdi. Proseslərdə yubanmalar müşahidə edilirdi. Bu baxımdan artıq Avropa İttifaqı da anlayır ki, Azərbaycan Avropa Şurasının moderatorluğu ilə keçirilən görüşlərdə Fransanı masada görmək istəmir. Başqa bir vasitəçinin bu formata daxil edilməsi bizim tərəfimizdən qəbul edilən deyil. Çünki Fransa açıq formada Ermənistanı dəstəkləyir. Ermənistanın sülh prosesində irəliləməsinə maneəçilik törədir. Ermənistanın silahlandırılmasına töhfə verir. Bu baxımdan da Brüssel görüşün əhəmiyyəti çoxdur. Ümid edirik ki, ABŞ-da baş tutan görüşdən sonra Brüssel görüşündə dövlət rəhbərlərini bir araya gəlməsi bu formatda görüşlərin davam etdirilməsi ilə nəticələnəcək”.
Millət vəkilinin sözlərinə görə Ermənistan verdiyi öhdəlikləri tutacağı təqdirdə yaxın dövrdə sülhün baş verməsi mümkün olacaqdır:
‘Sülh prosesinin baş verməsi üçün baza prinsipləri əsasında anlaşma imzalana bilər. Ancaq sərhədlərin tanınması, delimitasiya və demarkasiya məsələləri müəyyən zaman alacaq. Sülh anlaşması olacağı təqdirdə regionda uzunmüddətli və dayanıqlı sülhə biz daha da yaxınlaşacağıq. Kommunikasiyaların bərpa edilməsi mümkün olacaq. Azərbaycan-Ermənistan arasında münasibətlər normallaşacaqdır. İrimiqyaslı hərbi toqquşmaların təxribatların olma ehtimalı azalacaq. Bu region dövlətlərinin inkişafına töhfə vercəkdir”.
