Dünən keçirilən və oyundan sonra qalmaqalları ilə yadda qalan "Qalatasaray” - "Fənərbaxça” derbisi ilə bağlı daha bir biabırçı məqam üzə çıxıb.
Qol.az-ın Türkiyə mətbuatına istinadən yaydığı xəbərə görə, baş hakim Fırat Aydınusun qərarlarından narazı qalan "cim-com”un baş məşqçisi Fatih Terimin final fitindən sonra ona yaxınlaşdığı və üzünə tüpürdüyü iddia olunur.
Təcrübəli mütəxəssis oyunsonrası mətbuat konfransında da referinin ünvanına sərt sözlər işlədib: "Oyunu Fırata qədər və Fıratdan sonra olmaqla iki hissəyə ayırmaq olar. Meydanda ilk hissədə hesabda irəli çıxan, ikinci yarıda fərqi artıran və qol fürsətlərini qaçıran bir "Qalatasaray” var idi. Görünür, bunlar Fıratın xoşuna gəlmədi. Ümumilikdə, o, çox vaxt matçın önünə keçmək istəyir. Halbuki oyun çox yaxşı gedirdi. Hakim 2 mübahisəli qərar verdi. Birincisi, fit çaldığı epizodlarda qayda pozuntusu varsa, üzr istəməyə hazıram. İkincisi isə topun auta çıxdığı epizodla bağlıdır. Əgər həmin vaxt top həqiqətən Belhandanın ayağına dəyib meydanı tərk edibsə, yenə üzr istəyə bilərəm.
Bundan sonra baş verənlər də çox maraqlıdır. Ötən həftə VAR hakimi Barış Şimşək idi. Bu dəfə də bu vəzifəni ona həvalə etmişdilər. Deməli, başqası yoxdur. Tarık Onqun və Ali Palabıyık var. 7 hakimdən biri autu və qayda pozuntusunu görmədi. Haqqımı halal etmirəm. Heç bizimi haqqımızı yeyə bilməz. Rəhbərlərinə şikayət etsəm, arxalarında duracaqlar. Ən yaxşısı Allaha tapşırmaqdır. Bu qərarlara qədər oyunçular arasında 1 dənə çirkin hərəkət var idi? Hesab bir tərəfə, bərabərliyi də çətinliklə qoruyub saxladıq. 2:3 uduza da bilərdik. Halbuki böyükhesablı qələbə qazanacağımızı gözləyirdik”.
Qeyd edək ki, 2:2 hesabı ilə başa çatan derbidən sonra futbolçular arasında dava düşüb.
