"Prezident İlham Əliyevin Azərbaycan milli mətbuatının 150 illik yubileyi ilə bağlı imzaladığı sərəncam, öz mahiyyətinə görə, təkcə tarixi bir hadisənin qeyd olunması ilə məhdudlaşmır, həm də milli informasiya məkanında strateji-mədəni konturların yenidən müəyyənləşdirilməsinə xidmət edən kompleks sənəd kimi çıxış edir. 1875-ci il iyulun 22-də Həsən bəy Zərdabinin təşəbbüsü ilə nəşrə başlayan "Əkinçi” qəzeti ilə əsası qoyulmuş milli mətbuatın bir yarım əsrlik inkişaf yolu, bu sərəncam vasitəsilə rəsmi olaraq dövlətçilik ideologiyasının mərkəzi komponentlərindən biri kimi legitimləşdirilir".
Bu sözləri Editor.az İnformasiya Portalının baş redaktoru, siyasi şərhçi Fərid Şahbazlı deyib. Onun sözlərinə görə, sərəncamın mətnindəki vurğular bir daha göstərir ki, dövlət milli mətbuatı sadəcə informasiya ötürücüsü kimi deyil, həm də maarifçilik ideallarının daşıyıcısı, milli şüurun formalaşmasında aparıcı ideoloji institutlardan biri kimi qəbul edir. O qeyd edib ki, XIX əsrin sonlarında baş verən ictimai-siyasi transformasiyaların nəticəsi olaraq meydana çıxan milli mətbuat, bu sərəncam kontekstində modern Azərbaycan dövlətinin tarixi-fəlsəfi köklərinin ayrılmaz tərkib hissəsi kimi təqdim olunur: "Bu yanaşma həm tarixi yaddaşın gücləndirilməsinə xidmət edir, həm də media sektorunun gələcək inkişaf trayektoriyasının ideoloji əsaslarını müəyyənləşdirir.
Sərəncamın hüquqi və siyasi aktuallığı ondan ibarətdir ki, o, son illərdə medianın institusional müstəvidə tənzimlənməsi ilə bağlı atılan addımlarla — xüsusilə 2021-ci ildə Medianın İnkişafı Agentliyinin yaradılması və 2022-ci ildə qüvvəyə minən "Media haqqında” qanunla uzlaşdırılır və bu çərçivədə media sektoruna verilən strateji əhəmiyyət bir daha rəsmi şəkildə təsbit olunur. Prezidentin bu addımı, media mühitində baş verən struktur islahatlarını dəyərləndirməklə yanaşı, mətbuatın dövlətçilik konsepsiyasında nə qədər mərkəzi mövqedə dayandığını da nümayiş etdirir".
Baş redaktor bildirib ki, "Azərbaycan milli mətbuatının 150 illiyi (1875–2025)” yubiley medalının təsis olunması, bu sahədə xidmətləri olan şəxslərin fəaliyyətinə verilən yüksək dəyərdir: "Bu medal, yalnız fərdi nailiyyətlərin tanınması baxımından deyil, həm də jurnalistikanın cəmiyyətdəki reputasiyasının yüksəldilməsi və peşəkar medianın təşviqi baxımından strateji alət funksiyasını yerinə yetirir. Ötən dövrlərdə keçirilmiş oxşar yubileylərlə müqayisədə, bu dəfəki tədbirlər kompleks şəkildə hüquqi, mədəni və ideoloji müstəvidə daha geniş vüsət alır ki, bu da dövlətin informasiya siyasətinə münasibətdə konseptual dəyişikliklərə işarədir.
Post-münaqişə dövründə – xüsusən 2020-ci il Vətən müharibəsindən sonra informasiya təhlükəsizliyi və informasiya suverenliyi məsələlərinin prioritetə çevrildiyi bir şəraitdə, milli mətbuatın yubileyinin bu cür yüksək səviyyədə qeyd edilməsi, həm milli həmrəylik ruhunun möhkəmləndirilməsi, həm də beynəlxalq informasiya rəqabətində mövqelərin gücləndirilməsi məqsədi daşıyır".
Şahbazlı bildirib ki, bu sərəncam təkcə yubiley tədbirinin keçirilməsi ilə yekunlaşmır, əksinə, Azərbaycanın milli media strategiyasının həm daxili, həm də xarici ideoloji dayaq nöqtələrini aydın şəkildə formalaşdırır: "Beləliklə, Milli Mətbuatın 150 illiyi yalnız bir tarix deyil, həm də dövlətçilik fəlsəfəsinin media prizmasından təcəssümüdür"
