"İran xalqına qarşı repressiyalarda iştirak edən şəxslərə sanksiyalar tətbiq etmişik və etməyə davam edəcəyik. Yeni sanksiyalar paketi İran xalqına qarşı repressiyalara görə məsuliyyət daşıyan qurumları, xüsusilə də İran İslam Respublikasının məhkəmə sistemini hədəf alacaq”.
Bunu Fransa xarici işlər naziri Jan-Noel Barro deyib. "Yanvar ayında İranda keçirilən etiraz aksiyaları zamanı öldürülənlər arasında uşaqlar, qadınlar və kişilər də olub. ABŞ və İsrailin İrana qarşı müharibəsi və Hörmüz boğazının bağlanması İran rejiminin öz xalqına qarşı həyata keçirdiyi repressiyaları unutmağımıza səbəb olmamalıdır”, - o bildirib.
Fransanın xarici işlər naziri qeyd edib ki, İran rejiminin öz xalqına qarşı törətdiyi cinayətlərin cəzasız qalmasına imkan verməyəcəklər.
Jan-Noel Barro BMT Baş Assambleyasında İranda insan hüquqlarının vəziyyəti ilə bağlı qətnamənin qəbul edilməsinə də çağırıb: "Elə bu gün BMT Baş Assambleyasında İranda insan hüquqlarının vəziyyəti ilə bağlı qətnamə qəbul etməli və bu qətnamə əsasında İran xalqına qarşı törədilmiş cinayətləri insanlıq əleyhinə cinayətlər kimi tanımalıyıq”.
Nazir 2026-cı ilin yanvar ayında İranda keçirilən etiraz aksiyaları zamanı qadınların, kişilərin və uşaqların öldürülməsinə toxunaraq, Fransanın İran xalqının azadlıq uğrunda mübarizəsinə dəstəyini vurğulayıb.
Həmçinin Fransanın İranda vətəndaş cəmiyyətini, gəncləri, tələbələri və insan hüquqları müdafiəçilərini dəstəklədiyini söyləyib.
Xarici işlər naziri İran xalqının mübarizəsini "cəsarətli və ləyaqət dolu” adlandıraraq əlavə edib: "Ədalət olmadan sülh, həqiqət olmadan isə ədalət mümkün deyil”.
Mövzu ilə bağlı AZXEBER.COM-a açıqlamasında politoloq Züriyə Qarayeva bildirib ki, Avropa ölkələri İrana münasibətdə təzyiq siyasətini yalnız nüvə proqramı və regional təhlükəsizlik məsələləri ilə məhdudlaşdırmaq niyyətində deyil:
"Artıq insan hüquqlarının pozulması, etiraz aksiyalarının zorakılıqla yatırılması və məhkəmə sisteminin repressiv mexanizm kimi istifadə olunması da sanksiya siyasətinin əsas istiqamətlərindən birinə çevrilir. Xüsusilə İranın məhkəmə sisteminin hədəfə alınması təsadüfi deyil. Çünki siyasi fəallara qarşı məhkəmə qərarları, ağır cəzalar və hüquqi təqiblər beynəlxalq ictimaiyyətin ciddi narahatlığına səbəb olur. Fransanın bu mövqeyi həm də Avropanın İran hakimiyyətinə siyasi mesajıdır: regionda hərbi qarşıdurmanın mövcudluğu ölkə daxilində insan hüquqlarının pozulmasına göz yumulacağı anlamına gəlmir. Hesab edirəm ki, qarşıdakı dövrdə Avropa İttifaqı çərçivəsində İran rəsmilərinə, təhlükəsizlik strukturlarına və məhkəmə orqanlarının nümayəndələrinə qarşı əlavə fərdi və institusional sanksiyaların gündəmə gəlməsi mümkündür”.
Politoloq əlavə edib ki, Avropa ölkələrinin ABŞ və İran arasında hərbi qarşıdurmaya birbaşa qoşulması məsələsinə gəldikdə isə burada siyasi dəstəklə hərbi iştirak arasında fərq qoymaq lazımdır:
"Fransa, Almaniya və Böyük Britaniya İranın nüvə fəaliyyətindən və regional siyasətindən narahat olsalar da, genişmiqyaslı müharibənin Avropanın enerji təhlükəsizliyinə, iqtisadiyyatına və daxili sabitliyinə ciddi zərbə vuracağını anlayırlar. Xüsusilə Hörmüz boğazında gəmiçiliyin məhdudlaşdırılması Avropa dövlətlərini daha fəal təhlükəsizlik tədbirləri görməyə sövq edə bilər. Lakin bu, onların avtomatik olaraq ABŞ-ın İrana qarşı hücum əməliyyatlarına qoşulacağı demək deyil. Avropa ölkələrinin ilkin mərhələdə diplomatik təzyiqi artırması, sanksiyaları genişləndirməsi və dəniz yollarının təhlükəsizliyinin təmin olunmasına yönəlmiş müdafiə tədbirlərində iştirak etməsi daha real görünür. Bununla belə, Avropa dövlətlərinin hərbi qüvvələri və ya strateji obyektləri birbaşa hədəfə alınarsa, onların mövqeyi dəyişə bilər. Ümumilikdə, Avropanın əsas marağı İranın hərbi və siyasi imkanlarını məhdudlaşdırmaqla yanaşı, qarşıdurmanın daha geniş regional müharibəyə çevrilməsinin qarşısını almaqdır”.
Aynur Babazadə











































