Talan və zorakı toqquşmalarla müşayiət olunan ölkəmiqyaslı səfərbərlikdən sonra Fransa polisi yorğunluq ifadə edib. Polis əməkdaşları iğtişaşlarla mübarizədə yetərincə güc sərf olunmamasını pisləyir və asayişi qorumaq üçün istifadə edilən metodları şübhə altına alırlar.
Fransa mediası xəbər verir ki, Fransanın hüquq-mühafizə orqanları şənbə gününü "əsl cəhənnəm günü” adlandırıb.
"Bu zorakılıq aktları nəticəsində 600-dən çox polis əməkdaşı, jandarm və yanğınsöndürən xəsarət alıb”, - deyə Fransanın daxili işlər naziri Loran Nunyes bildirib.
Oktyabrın 17-də alovlanan etirazlar hakimiyyətə qarşı müxtəlif şikayətləri olan insanları birləşdirib. Narazılığın əsas səbəbi yaşayış xərclərinin yüksək olması, yanacaq qiymətlərinin artması və alıcılıq qabiliyyətinin azalmasıdır. "Sarı jiletlilər”, işçilər, məktəblilər və tələbələr də dövlət xidmətləri, xüsusən də təhsil üçün artırılmış resursları tələb edirdilər.
Lakin onların tələbləri Fransa boyunca yürüşlərinə xələl gətirən talan və şəhər zorakılığı fonunda tamamilə kölgədə qalıb. Nümayişlərdən əvvəl də çoxsaylı zorakılıq aktı qeydə alınıb, o cümlədən nəqliyyatın hərəkətini pozmağa yönəlmiş blokadalar təşkil olunub, ardınca ilk mərmilər atılıb və zamanla ictimai binalar dağıdılıb, mağazalar talan edilib və maneələr aşılıb.
Gecənin yarısına qədər davam edən iğtişaşlar zamanı hüquq-mühafizə orqanlarının əməkdaşları özlərini toqquşmaların və talanların mərkəzində tapıblar. Onlara ən aqressiv iğtişaşçılar hücum edib, səki daşları atıb, hətta yumruqlayıblar.
///azərtac///
