Avropa İttifaqı (Aİ) Fransada və İspaniyada davam edən meşə yanğınları ilə mübarizə çərçivəsində hava və quru dəstəyi göstərildiyini açıqlayıb.
AZXEBER.COM xarici mətbuata istinadən xəbər verir ki, Avropa Komissiyasının açıqlamasında iki ölkədə baş verən yanğınların Avropada son illərin ən böyük təxliyə əməliyyatlarından birinə səbəb olduğu bildirilib. Qeyd olunub ki, 300 mindən çox insan yaşayış yerindən təxliyə edilib.
Fransaya Çexiya, Xorvatiya, Almaniya, Portuqaliya, Slovakiya, İsveç və Türkiyədən 7 təyyarə və 4 helikopter göndərilib. Bu təyyarələrin əksəriyyətinin "rescEU” yanğınsöndürmə donanmasının tərkibində olduğu bildirilib.
İspaniyaya isə Yunanıstan, İtaliya və Türkiyədən 6 təyyarə göndərilib. Portuqaliyadan 134 yanğınsöndürən və 41 texnikanın da bölgəyə cəlb edildiyi açıqlanıb.
Aİ-nin "Copernicus” peyk xidməti də yanğınlarla mübarizəni dəstəkləmək üçün təcili xəritələr təqdim edir.
Avropa Komissiyası Fransa və İspaniya rəsmiləri ilə əlaqədə olduğunu və əlavə dəstək imkanlarını qiymətləndirdiyini bildirib.
Qeyd edək ki, bir ölkə Aİ Mülki Müdafiə Mexanizmi çərçivəsində yardım istədikdə, müraciət mexanizmə qoşulan 37 ölkəyə göndərilir. Bu ölkələr imkanları daxilində təyyarə, helikopter, yanğınsöndürən qrupları, texnika və ekspert dəstəyi göstərə bilirlər.
Tarixinin ən böyük yanğın mövsümlərindən birini yaşayan Fransada ilin əvvəlindən indiyədək 98 min hektardan çox ərazi yanıb. Gironde, Landes və Var vilayətlərində günlərdir davam edən yanğınlar hələ də nəzarət altına alınmayıb.
İspaniyanın Avila bölgəsində isə meşə yanğınlarından zərər çəkən yaşayış məntəqələrində təxliyə işləri davam edir.
Xatırladaq ki, Türkiyə də İspaniyanın meşə yanğınları ilə mübarizəsinə dəstək məqsədilə 2 yanğınsöndürmə təyyarəsi göndərib.
Gülay
