6 aprel 2012-ci il tarixində Fransanın paytaxti Parisdə, Sarbon universitetinin amfiteatrında ilk dəfə olaraq Qurban Səidin məşhur “Əli və Nino” romanının motivləri əsasında yeni muzikl tamaşa səhnəyə qoyulacaq.

ASAİF-in mətbuat xidmətindən AZXEBER.COM-a verilən məlumata görə, 1937-ci ildə nəşr olunmuş və 30-dan çox dilə tərcümə olunmuş bu məşhur roman mədəniyyətlər və dinlər arası konfliktlərdən bəhz edən məhəbbət əsəridir.

Müxtəlif mədəniyyətlərə, müxtəlif dinlərə mənsub olan insanlar arasında qarşılıqlı anlaşmanın olamaması problemi o dövrdə olduğu kimi, bu gün də olduqca aktualdır. Romanda da məhz bu anlaşılmazlıqdan qaynaqlanan problemlər öz əksini tapır. Real həyatdan götürülmüş hadisələr mürəkkəb axarla cərəyan edir və sonda sevgi hər şeyə qalib gəlir.

Hər kəsi bu sevgi romanındakı hadisələri izləməyə, eləcə də XX əsrin əvvəllərindəki Azərbaycana və paytaxt Bakıya səyahət etməyə dəvət edirik.

“Əli və Nino” romanı tam yeni nəfəslə səhnəyə qoyulacaq. Tamaşada romandan bəzi parçalar, Azərbaycan və Gürcüstanın milli musiqi və rəqsləri, eləcə də, XIX və XX əsrlərin Azərbaycan və Avropa bəstəkarlarının əsərləri nümayiş etdiriləcək.

İştirakçılar:

Romandan parçaların oxunması: Flaviya Tursi və Olqa Quşina-Mano

Rəqslər: Lali Caşiaşvili, İrakliy Oboladze, Fidan Əhmədova, Vusalə Məmmədzadə, Aysel Səfərova.

Mahnıların ifası: Tamara Demuriya və “Lazi” gürcü ansamblı.

Skripka: Prisil Lyaşa Sarret.

Fortepiano: Səidə Zülfüqarova.

Dramaturgiya: Şarlot Lorio.

İdeya müəllifi və layihə rəhbəri: Səidə Zülfüqarova.

Tamaşada Qara Qarayev, Azər Rzayev, Üzeyir Hacıbəyov, Vaqif Mustafazadə, Fikrət Əmirov, Cövdət Hacıyev, Jules Massenet, Rahmaninov, Fritz Kreyslerin əsərləri, o cümlədən Azərbaycan və Gürcü milli musiqiləri səslənəcək.

Tədbir Səidə Zülfüqarovanın rəhbərliyi və təskilatçılığı, eyni zamanda Xaricdə Təhsil alan Azərbaycan Gənclərinin Beynəlxalq Forumu (ASAİF) və Azərbaycan – Fransa Tələbələr Birliyinin (AFAJ) dəstəyi ilə keçirilir.