“Fransanın ATƏT-in Minsk qrupundan çıxmasını gözləmək lazımdır”
AZXEBER.COM-un məlumatına görə, bu sözləri jurnalistlərə açıqlamasında Türkiyənin Azərbaycandakı səfiri Hulusi Kılıç deyib. Səfir qeyd edib ki, Fransanın bu məsələdə etimadsızlığı tamamilə ortalığa çıxıb. Onun sözlərinə görə, ATƏT-in Minsk qrupunun tərkibində Fransanın qalması məsələsinə baxılacaq: “Bundan sonra Fransanın Minsk qrupundan çıxmasını gözləmək lazımdır. Təbii ki, artıq Azərbaycanda Fransaya qarşı etibarsızlığı nümayiş etdirən açıq şəkildə bəyanatlar səsləndirildi. Fransanın bundan dərs çıxarmasını gözləyirik”. H. Kılıç həmçinin Ermənistan XİN başçısı Edvard Nalbandyanın “Əgər Türkiyə əslində Dağlıq Qarabağ münaqişəsinin nizama salması prosesinə səmimiyyətlə kömək etməyi arzu edirsə, onda uzaq dayanmalıdır” şərhinə də münasibət bildirib: “Nalbandyanın şərhi barədə heç nə demək istəmirəm. Çünki regionda haqsızlıq olub, Azərbaycanın torpaqları işğal olunub və məhz buna görə də Türkiyə Ermənistanla öz sərhədini bağlayıb”. Səfir Fransa Senatının qəbul etdiyi qanunun ədalətsiz olduğunu bir daha vurğulayıb.
