Millət vəkili Jalə Əliyevanın ideya müəllifi olduğu, Milli Qəhrəman Mübariz İbrahimovun əziz xatirəsinə həsr olunan Vətənpərvərlik mövzusunda gənclərin 1-ci Ümumrespublika Teatr Festivalı davam edir.

Festivalla bağlı AZXEBER.COM portalı Azərbaycan Taekvondo Federasiyasının I Vitse – Prezidenti, polkovnik Füzuli Musayevin fikirlərini öyrənib.

"O gənclik ki, “Xarı bülbül”lə böyüyüb o vətənini və torpağını mütləq tanıyacaq və onu sevəcək".

"Erməni kimdir ki, biz onunla mübarizə etmədən gedək özümüzü öldürək?".

"Diktor Qazaxıstan idmançısı Fizuli Musayev kürsüyə buyursun dedi".

"İdmançı üçün ən böyük vətənpərvərlik qalibiyyətdən sonra tökülən göz yaşlarıdır".

- Milli Qəhrəman Mübariz İbrahimovun əziz xatirəsinə həsr olunan Vətənpərvərlik mövzusunda gənclərin 1-ci Ümumrespublika Teatr Festivalı keçirilir.Bu festivala münasibətiniz?

Vətənpərvərlik mənim düşüncəmlə, daha böyük mənaları özündə daşıyan bir mənəvi yükə malikdir. Gənclərimizlə bağlı yeni bu cür böyük bir festivalın keçirilməsi çox təqdirəlaiq bir haldır. Qonşu ölkələrdə vətənpərvərlik anlayışlarına diqqətlə baxsanız görərsiniz ki, Türkiyədə hər ailənin evində bayraq asılıb. Eynilə Rusiyada hər hansı bir qələbə zamanı bayraqlar küçələrə çıxardılır. Bizdədə bu ənənələrdavam etdirilir.

Deyillər ki, vətən üçün ölmək ona ən böyük xidmətdir. Siz necə düşünürsünüz vətən üçün ölmək lazımdır yoxsa ...?

O sözlər pafoslu sözlərdir. Mən bu cür pafoslu, təşkilati sözləri sevmirəm. Onsuzda əcəlin harada gəldi sən orada öləcəksən. Ölmək yox, vətən üçün yaşamaq lazımdır. Niyə ölmək axı? Qoy bizi istəməyənlər ölsün. Erməni kimdir ki, biz onunla mübarizə etmədən gedək özümüzü öldürək? Bu cür düşüncələri ümumiyyətlə beyinlərdən silmək lazımdır. Çünki vətən üçün yaşamaq onu qorumaq lazımdır. Hazırda bir çox gənclərimiz var ki, Azərbaycanı xaricdə təmsil edirlər. O gənclik ki, “Xarı bülbül”lə böyüyüb o vətənini və torpağını mütləq tanıyacaq və onu sevəcək.

Bəs bir idmançı üçün vətənpərvərlik nədir?

Bir idmançı üçün vətənpərvərlik, ölkəsinin bayrağının hər zaman yüksəklərdə olmasıdır.Əvvəllər, Azərbaycan SSRİ-nin tərkibində olanda bizim idmançılarımızın hər bir nailiyyəti SSRİ_nin adı ilə bağlanırdı. Bu təkcə bizə aid deyildi. SSRİ-yə daxil olan bütün dövlətlərdə bu belə idi. Ancaq SSRİ-i dağıldıqdan sonra artıq hər kəs öz ölkəsinin adını daşımaq üçün idmanla məşğul olmağa başladı. Bax, bir idmançı üçün ən böyük vətənpərvərlik budur.

Hərdən bir idmançının bayrağı altında, himnini oxuyarkən axıtdığı göz yaşı onu izləyən həmvətənlərinin qəlbində böyük iz buraxır. Siz özünüz bir idmançı kimi o göz yaşlarını axıdarkən nələri düşünmüsünüz?

1995-ci ildə mən Meksikada dünya çempionu oldum və mükafatlandırılma mərasimi keçirildi. Təbii ki, o zamanlar bizim ölkə yeni yarandığı üçün bəzi problemlər yaşanırdı. Bu zaman təqdimat mərasimi keçirildi və diktor Qazaxıstan idmançısı Fizuli Musayev kürsüyə buyursun dedi. Mənsə kürsüdən düşərək ölkəmin adının yanlış səsləndirildiyini Qazaxıstandan yox, Azərbaycandan olduğumu onlara söylədim. Onlar isə səhvlərini düzəltdilər. Məndə bayrağımıza sarılaraq göz yaşlarımı saxlaya bilmədim. İnanın məni dörd nəfər orada döysə idi ağlamazdım, amma o an özümü saxlaya bilməyib ağladım.Sizin dediyiniz kimi, bir idmançı üçün ən böyük vətənpərvərlik qalibiyyətdən sonra tökülən göz yaşlarıdır.

Əfsələddin AĞALAROV