Bu gün Azərbaycanda 27 Sentyabr – Anım Günü qeyd olunur. Bu tarix 2020-ci ildə başlayan və 44 gün davam edən Vətən müharibəsinin başlanğıcı kimi Azərbaycan tarixində mühüm yer tutur.
2020-ci il sentyabrın 27-də Azərbaycan Ordusu cəbhəboyu genişmiqyaslı hərbi təxribatlara cavab olaraq əks-hücum əməliyyatına başlayıb. 44 gün davam edən müharibə nəticəsində Azərbaycanın bir sıra şəhər, rayon və kəndləri işğaldan azad edilib.
Mövzu ilə bağlı AZXEBER.COM-a danışan təhsil eksperti Məzahir Məmmədli bildirib ki, 27 Sentyabr və Vətən müharibəsi ilə bağlı hadisələrin gələcək nəsillərə düzgün şəkildə çatdırılması vacibdir:
"Bildiyiniz kimi, Azərbaycanda 2020-ci il 27 sentyabrdan sonra ümumtəhsil məktəblərində, ali təhsil müəssisələrində, kolleclərdə və müxtəlif idarə, müəssisə və təşkilatlarda bu tarix xüsusi olaraq qeyd olunur. Həmin günlərdə tariximizdə iz buraxan mühüm hadisələr xatırlanır və gələcək nəsillərə çatdırılır. Mən düşünürəm ki, illər ərzində işğal altında olan rayonlarımızın adlarını kədərlə sadaladığımız kimi, bu gün həmin rayonların hər birinin azad olunmasını da qürur və sevgi ilə xatırlamalıyıq. Hətta işğal tarixlərinin də unudulmaması vacibdir. Çünki biz öz tariximizi yalnız qələbələrimizlə deyil, yaşadığımız ağrılı və çətin dövrlərlə birlikdə öyrənməliyik”.
M. Məmmədlinin sözlərinə görə, şagirdlərə Qarabağda baş verən hadisələr haqqında yaşlarına uyğun və düzgün məlumatların verilməsi mühüm əhəmiyyət daşıyır:
"Biz təbliğatımızı hər zaman sülh, multikultural dəyərlər və humanizm üzərində qururuq. Arzumuz müharibələrin olmaması və insanların sülh şəraitində yaşamasıdır. Lakin tariximizi də unutmaq olmaz. Buna görə uşaqlara, xüsusilə məktəb yaşlarından başlayaraq, Qarabağda yaşanan hadisələr haqqında onların yaşına uyğun, düzgün və obyektiv məlumatlar verilməlidir. Şagirdlərimiz bilməlidirlər ki, torpaqlarımızın işğalı uzun illər davam edib, həmin ərazilərdə ciddi dağıntılar və məcburi köçkünlük yaşanıb. Eyni zamanda onlar 2020-ci ildə Azərbaycanın ərazi bütövlüyünün bərpası istiqamətində əldə etdiyi nəticələri də bilməlidirlər”.
M. Məmmədli bildirib ki, Vətən müharibəsində şəhid və qazilərin göstərdiyi fədakarlığın gələcək nəsillərə çatdırılması cəmiyyətin məsuliyyətidir:
"44 günlük Vətən müharibəsində Azərbaycan çox ağır itkilər verdi. Minlərlə şəhidimiz və qazilərimiz oldu. Buna görə qələbənin arxasında dayanan fədakarlığı gələcək nəsillərə çatdırmaq bizim məsuliyyətimizdir. Məncə, müəllim üçün ən böyük dəyərlərdən biri bu tarixi şagirdlərinə düzgün şəkildə anlatmaqdır. Çünki tarix yalnız kitab səhifələrində qalmamalıdır. Şagirdlər həm 30 ilə yaxın davam edən işğal dövrünü, həm də həmin torpaqların azad olunması ilə bağlı hadisələri bilməlidirlər. Biz qələbəmizi qürurla qeyd etməli, eyni zamanda keçmişimizi unutmamalıyıq. Çünki gələcəyi düzgün qurmaq üçün tariximizi bütün tərəfləri ilə bilmək vacibdir”.
Fəridə Əsədzadə
