Gənclər üçün Təhsil Mərkəzi Azərbaycan Respublikası Gənclər və İdman Nazirliyinin dəstəyi ilə gənc təlimçilərin məlumat bankının yaradılmasına başlayır.

 Mərkəzdən AZXEBER.COM verilən xəbərə görə, bir neçə mərhələdən ibarət olan layihənin əsas məqsədi gənc təlimçilər haqqında vahid informasiya bazasının qurulmasına, onların şəbəkələşməsinə, gənclər arasında qeyri-formal təhsil metodologiyasının təşviq olunmasına və təlimçilik bacarıqlarının inkişaf etdirilməsinə dəstək verməkdir.

Yaradılacaq məlumat bankında Azərbaycanda fəaliyyət göstərən hər bir təlimçi, onun keçirdiyi təlimlərin mövzuları və digər informasiyalar yerləşdiriləcək. Mərkəz ölkənin bütün şəhər və rayonlarından bu məlumatların toplanması üçün xüsusi sorğu blankları hazırlayıb.

Qeyd edək ki, məlumat bankının cari ilin sonuna qədər tam hazırlanması və ictimaiyyətə təqdim olunması planlaşdırılır.