Avropa Gənclər Forumu tərəfindən 2009-cu ildən etibarən “Avropa Gənclər Paytaxtı” seçilir

Bu günə kimi Roterdam, Turin, Antverb, Praqa, Maribor, Saloniki və Kluj-Napoka şəhərləri Avropa Gənclər Paytaxtı adına layiq görülüb. AZXEBER.COM-un məlumatına görə, Gəncə şəhəri 2016-cı ildə Avropa Gənclər Paytaxtı olmaq üçün Avropa Gənclər Forumunun təşkil etdiyi müsabiqəyə qoşulub. Müsabiqədə Avropanın müxtəlif ölkələrindən olan 12 şəhərlə yarışan Gəncə hədəfinə yaxınlaşmağa nail olub. Hazırda müsabiqənin final mərhələsinə adlayan Gəncə digər 5 şəhərlə Badajoz (İspanıya), Galvay (Şimali İrlandiya), La Laguna (İspaniya), Varna (Bolqariya) və Vilnius (Litva) şəhərləri ilə yarışmalı olacaq. Məsələyə bağlı AZXEBER.COM-a danışan Gəncə Şəhər Gənclər və İdman idarəsinin rəisi Müşfiq Cəfərov deyib ki, Gəncə artıq neçə ildir ki, yerli və beynəlxalq səviyyəli tədbirlərə ev sahibliyi edir: "Gəncə yerli və beynəlxalq səviyyəli tədbirlər keçirməkdə böyük təcrübəyə malikdir. Çox sevindirici haldır ki, Gəncə Avropa Gənclər Paytaxtı olmaq üçün müsabiqəyə qoşuldu və qısa siyahıya (short list) düşə bildi. Onuj da qeyd edim ki, bu Cənubi Qafqazda ilk dəfə baş verən haldır. Belə ki, keçən il Tbilisi, bu il isə Batumi şəhərləri müsabiqəyə qatılsalar da qısa siyahıya düşə bilməyiblər". Müşfiq Cəfərov həmçinin qeyd edib ki, Gəncədə gənclər üçün hər cür şərait yaradılıb: Bu gün Gəncədə gənclərin istirahəti, təhsili, özlərini inkişaf etdirmələri üçün hər cür şərait yaradılıb. Təsadüfi deyil ki, ölkəmizin ən böyük QHT-lərindən bir neçə məhz Gəncədə fəaliyyət göstərir. Gəncədə universitetlər wi-fi ilə təchiz olunublar. Hər il Gəncədə beynəlxalq səviyyəli müsabiqələr, yarışlar keçirilir. Bütün bunlar onu deməyə əsas verir ki, Gəncə Avropa Gənclər Paytaxtı olmağa layiq şəhərdir” Qeyd edək ki, Avropa Gənclər paytaxtının seçimi noyabr ayının 23-ü Yunanıstanın Salonik şəhərində baş tutacaq. Hacıbəy Heydərli