Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən Gəncə şəhərində "Qeyri-formal məşğulluğun qarşısının alınması" və "İş yerlərində əməyin mühafizəsi" mövzularında maarifləndirmə tədbiri təşkil olunub.
AZXEBER.COM xəbər verir ki, tədbirdə Nazirliyin və tabeliyində fəaliyyət göstərən qurumların, ictimai birliklərin nümayəndələri, eləcə də Xidmətin Gəncə-Daşkəsən regional şöbəsinin əhatə etdiyi rayonlardan dövlət və özəl sektoru təmsil edən 30-a yaxın şəxs iştirak edib.
Görüş zamanı qeyri-formal məşğulluğun aradan qaldırılması, əmək münasibətlərinin leqallaşdırılması və sosial rifahın yüksəldilməsi istiqamətində maarifləndirmə tədbirlərinin əhəmiyyəti diqqətə çatdırılıb.
Bununla yanaşı, qadınların qeyri-formal məşğulluğa qarşı məlumatlandırılması, onların əmək bazarında hüquqlarının qorunması və rəsmi məşğulluğa cəlb edilməsinin vacibliyi barədə iştirakçılara ətraflı məlumat verilib.
Tədbirin sonunda mövzu ətrafında geniş müzakirələr aparılıb, iştirakçıları maraqlandıran suallar cavablandırılıb.
