Xəbər verdiyimiz kimi, Gəncə şəhər 34 saylı məktəbin 11-ci sinif şagirdi olan Elgün İbrahimov hələlik istintaqa məlum olmayan şəxs və ya şəxslər tərəfindən qətlə yetirilib.
Elgünün qətli ilə bağlı sosial şəbəkədə kampaniya başladılıb.
Milli Məclisin Gəncədən seçilən deputatı Naqif Həmzəyev baş vermiş hadisə ilə bağlı AZXEBER.COM-a açıqlama verib.
Deputat baş vermiş hadisədən kədərləndiyini bildirərək, cinayətkarların cəzasız qalmayacağını bildirib:
"Çox təəssüf ki, belə amansız hadisə baş verib. Çox üzülürəm və kədərlənirəm. Azərbaycan Polisi və güc orqanları cinayəti törətmiş şəxs və ya şəxsləri mütləq tapacaq. Cinayətkarlar cəzasız qalmayacaq. Qanun qarşısında cavab verəcək. Elgünün ailəsinə və yaxınlarına başsağlığı verirəm. Allah səbr versin.
Deputat deyib ki, normal insan belə bir cinayət törədə bilməz:
"Normal insan belə hadisə törədə bilməz. Tezliklə cinayətin səbəb və təfərrüatlarını öyrənəcəyimizə ümid edirik. Cəmiyyətimizdə belə ağır və ağılasığmaz cinayətlərin baş verməməsi üçün daha çox işləməliyik. Təhsil müəssisələri, valideyinlər, aidiyyatı qurumlar səfərbər olmalı, uşaqlarımızın, yeniyetmə gənclərin tərbiyəsinə daha çox yatırım etməlidir. Uşaqların ən həssas dönəmlərində onları qətiyyən tək qoymaq olmaz. Kaş bu hadisə baş verməzdi. Bir gəncin, bir ailənin ümidləri puç olmazdı. Heyif..."
Günel Hüseynli
