Müasir dövrdə narkotik təhlükəsi təkcə cəmiyyətin deyil, ailələrin də ciddi narahatlıq mənbəyidir. Gənclərin bu yola düşməsinin qarşısını almaqda valideynlərin rolu olduqca vacibdir. Əgər bir valideyn olaraq övladınızda belə bir meyil sezirsinizsə, dərhal, lakin düşünülmüş şəkildə hərəkət etmək lazımdır.
Gəncləri narkotikə aparan səbəblər
Gənclər çox vaxt narkotik maddələrə təsadüfi səbəblərlə deyil, müəyyən daxili və xarici amillərin təsiri ilə yönəlirlər. Bura aşağıdakılar daxildir: yaşıdlarının təsiri, özünü sübut etmə istəyi, emosional boşluq, stres, depressiya və ya sadəcə maraq. Bu səbəbləri anlamaq, valideynin düzgün reaksiya verməsi üçün əsasdır.
Diqqətli olun: Əlamətləri vaxtında görün
Övladınızda aşağıdakı əlamətlər görünürsə, məsələni diqqətdən kənarda qoymayın:
Davranış və əhvalda dəyişikliklər
Məktəb göstəricilərinin zəifləməsi
Yeni və şübhəli dostlar
Evdən pul və ya əşyaların itməsi
Gizli və qaçqın davranış
Söhbət üçün doğru anı seçin
Bu mövzuda danışmaq çətindir, lakin vacibdir. Sakit bir an seçin və övladınızı mühakimə etmədən dinləyin. Suallarınızı açıq və anlayışla verin:
"Son günlər nə hiss edirsən?",
"Ətrafında siqaret, spirt və ya başqa maddələrdən istifadə edən var?",
"Sən heç istifadə etmisən?"
Söhbətdə əsas məqsəd onu qorxutmaq deyil, vəziyyəti birlikdə çözmək olduğunu göstərməkdir.
Qaydaları sevgi ilə müəyyən edin
Övladınızla münasibətlərdə aydın sərhədlər çəkmək vacibdir. Onun hansı davranışların qəbuledilməz olduğunu və hansı nəticələr doğuracağını bilməsi lazımdır. Amma bu, hədə-qorxu ilə deyil, anlayış və qayğı ilə çatdırılmalıdır.
Daim müşahidə edin və dəstək verin
Övladınızın kimlərlə görüşdüyünü, gün ərzində harada olduğunu və nələrlə maraqlandığını diqqətdə saxlayın. Bu nəzarət güvənin pozulması deyil, onun təhlükəsizliyi üçün lazımdır. Eyni zamanda, evdə asanlıqla əldə edilə biləcək alkoqol və ya dərmanlara da nəzarət edin.
Maarifləndirməyə tez başlayın
Bu barədə danışıqları erkən yaşlardan başlamaq tövsiyə olunur. Sadə, aydın və yaşına uyğun şəkildə ona narkotiklərin sağlamlığa və psixoloji vəziyyətə necə zərər verdiyini başa salın. Bu söhbətlər təkcə bir dəfə deyil, ardıcıl və təkrar olmalıdır.
Peşəkar yardımdan çəkinməyin
Əgər vəziyyət nəzarətdən çıxırsa və ya övladınız istifadəni etiraf edirsə, dərhal mütəxəssis dəstəyi axtarın. Psixoloq, məktəb psixoloqu və ya tibb mütəxəssisləri bu mərhələdə sizə və övladınıza düzgün yol göstərə bilərlər.
Məhbubə Mehdiyeva
