Məsələ ilə əlaqədar komitə tərəfindən araşdırma aparılır.
Dövlət Gömrük Komitəsi Sədərək gömrük-keçid məntəqəsi rəisi Mirməhəmməd Seyidovun Türkiyədə saxlanılması ilə bağlı açıqala verilib. Dövlət Gömrük Komitəsinin Mətbuat Xidmətinin rəisi Natiq Axundovun verdiyi məlumata görə, məsələ ilə əlaqədar komitə tərəfindən araşdırma aparılır. O, araşdırma ilə bağlı mətbuata məlumat veriləcəyini bildirib. Qeyd edək ki, Sədərək Gömrük Məntəqəsinin rəisi Mirməhəmməd Seyidov Türkiyədə həbs olunub. Türkiyə mətbuatının yaydığı məlumatlarda Mirməhəmməd Seyidov rüşvət və qaçaqmalçılıq əməliyyatı çərçivəsində saxlanıldığı qeyd olunub. Belə ki, dünən Qarsa gedən Mirməhəmməd Seyidov təyyarədən düşən kimi Türkiyənin Mütəşəkkili Cinayatələrə Qarşı Mübarizə İdarəsinin əməkdaşları tərəfindən tutulub. Qarsdan İqdıra gətirilən Seyidov xəstəxanada müayinədən keçiriləndən sonra idarəyə aparılıb. Azərbaycanın İqdırdakı konsulu Asiman Əliyev bu idarəyə gəlib. Türkiyə ilə Naxçıvan arasındakı Dilucu Sərhəd Məntəqəsində 280 polisin apardığı əməliyyatda 1-i qadın olmaqla 7 gömrük əməkdaşı saxlanılıb. Əməliyyatda həmçinin 10 nəqliyyat şirkətinin sahibi də həbs olunub. Hazırda əməliyyatla bağlı araşdırmalar başlanılıb.
