Gülənçi-Doğançı şəbəkənin ermənipərəst siması

Azərbaycanla Türkiyə iki dost, qardaş ölkə olmaqla hər zaman bir-birinə dəstək olublar. Hələ müstəqilliyin ilk illərində iki qardaş ölkə arasında qarşılıqlı faydalı əməkdaşlıq prinsipləri mühüm strateji xətt olmuşdur. Azərbaycanın dünya birliyinə inteqrasiyasında, regional təhlükəsizliyin qorunmasında, ümumiyyətlə, ölkəmizin siyasi-iqtisadi və elmi-mədəni maraqlarının reallaşmasında Türkiyə dövləti ilə hərtərəfli əməkdaşlığın genişlənməsinə xüsusi əhəmiyyət verən Ümummilli Lider Heydər Əliyev 1993-cü ildə yenidən hakimiyyətə qayıdışından sonra bu istiqamətdəki kursun yüksələn xətt üzrə inkişafını təmin etdi. Xalqın dəstəyini qazanıb, prezident seçildikdən sonra Ulu Öndər ilk rəsmi səfərini Türkiyəyə etmişdir. 1994-cü il fevralın 4-dən 11-dək davam edən səfər zamanı Azərbaycanla Türkiyə arasında əməkdaşlıq və qarşılıqlı yardım haqqında protokol, iqtisadi, elmi-texniki və mədəni sahələrdə əməkdaşlıq haqqında saziş, dostluq və hərtərəfli əməkdaşlığın inkişafı barədə müqavilə və digər məsələlər haqqında 16 mühüm sənəd imzalandı. Sonrakı illərdə bu əlaqələr, əməkdaşlıq münasibətləri daha da dərinləşdi. 2003-cü ildə Ulu Öndər Heydər Əliyevin ən layiqli siyasi varisi Cənab İlham Əliyevin Azərbaycan Prezidenti seçilməsindən sonra iki ölkə arasında əlaqələr dahada inkişaf etmişdir. Amma Türkiyə-Azərbaycan birliyi, iki qardaş ölkə arasında strateji tərəfdaşlıq əlaqələrinin möhkəmlənməsi xaricdəki anti-Türkiyə və anti-Azərbaycan dairələri bərk narahat edir. Həmin məkrli dairələr Azərbaycana qarşı qaryaxma kampaniyası aparır, məntiqsiz iddialar, əsassız ittihamlar səsləndirirlər.

Bu dairələr Türkiyə və Azərbaycan prezidentlərinin möhkəm dostluq əlaqələrindən, hər iki ölkə başçısının bir-birinə hərtərəfli, qarşılıqlı dəstəyindən qıcıqlanırlar. Onların bütün səyləri dövlət rəhbərləri arasında etimadsızlıq və nifaq toxumu səpməyə, iki qardaş ölkənin münasibətlərinə xələl gətirməyə yönəlib. Bu məqsədlə Qərb dairələri tərəfindən idarə olunan "5-ci kolon"un imkanlarından geniş istifadə olunur. Türkiyə iş adamı Aydın Doğanın və ABŞ xüsusi xidmət orqanları tərəfindən idarə olunan gülənçilərin birgə şəkildə Azərbaycana qarşı kampaniyasının əsasında dayanan amillərdən biri də məhz Prezident İlham Əliyevin R.T.Ərdoğana dəstəyidir. Aydın Doğan Türkiyə tarixində ən qalmaqallı, korrupsioner iş adamı kimi tanınır. Onun Türkiyənin biznes həyatında ildırım sürəti ilə yüksəlişi və ölkə daxilində ictimai-siyasi proseslərə təsir gücü erməni mənşəli olması (məlumata görə, A.Doğan türk ailəsi tərəfindən götürülmüş və böyüdülmüş ermənidir), həmçinin xarici anti-Türkiyə qüvvələrə xidmət etməsi ilə izah olunur.

Aydın Doğanın dövlətə məxsus neft şirkəti "Petrol Ofisi"ni fırıldaqçı üsulla necə ələ keçirdiyini Türkiyədə yaxşı xatırlayırılar. Aydın Doğanın Türkiyə ordusunun generaliteti ilə korrupsiya əlaqələri sayəsində tenderdə uduzduğu halda xüsusi əmrlə necə qalib elan edildiyi heç kimə sirr deyil. 2001-ci ildə Türkiyə Silahlı Qüvvələrinin Xüsusi Təyinatlı Qüvvələr Komandanlığının ehtiyacı üçün 450 min ton yanacağın alınmasına dair keçirilən tenderdə Aydın Doğanın "Petrol Ofisi" şirkəti korrupsiya sövdələşməsi sayəsində qalib elan edilib. A.Doğan həm də "Kanal D", "CNN Türk", "Hürriyyət", "Radikal" kimi çoxsaylı media qurumlarının təmsil olunduğu "media patronu" kimi tanınır. Onun öz biznes dairəsini genişləndirmək, siyasi proseslərdə iştirak etmək niyyətlərini reallaşdırmaqda bir vasitə kimi sahibi olduğu media qurumlarının imkanlarından geniş istifadə etdiyi bəllidir.

Bu media qurumlarından həm də A.Doğanın çirkin əməllərini ifşa edən hakimiyyət orqanlarına qarşı çirkin kampaniya təşkil edilməsində fəal istifadə olunurlar. 2009-cu ildə Türkiyənin Maliyyə Nazirliyi Aydın Doğanın holdinqini rekord məbləğdə - 2,5 milyard dollar vergi ödəməyə məhkum edib. Nazirliyin müfəttişlərinin iki ildən çox davam edən araşdırmaları nəticəsində məlum olmuşdur ki, "Doğan Group"un rəhbərləri 2006-cı ilin dekabr ayında holdinqə daxil olan şirkətlərin səhmlərini üç həftə ərzində bir şirkətdən digərinə satıb, bu zaman milyardlarla dolları vergidən gizlədib.

Azərbaycan öz müstəqilliyinə yeni qovuşanda ölkəyə soxulmaq və iqtisadiyyatın müxtəlif sahələrində, o cümlədən də neft sektorunda mövqe əldə etmək istəyən çoxsaylı işbazlardan biri də A.Doğan olub. Lakin həmin dövrdə onun niyyətlərinin reallaşmasına imkan verilməməsi Doğanın Azərbaycana qarşı davamlı şəkildə radikal kampaniya təşkil etməsinin səbəblərindən biridir. Ekspertlər hesab edirlər ki, neft yataqlarının istismarı, neft emalı və satışı ilə məşğul olan Aydın Doğanın SOCAR-ın Türkiyədə və regionda aktiv fəaliyyətini həzm edə bilmir. Müşahidələr belə deməyə əsas verir ki, hal-hazırda Türkiyədə Azərbaycanın əleyhinə təbliğat aparan və bu istiqamətdə fəaliyyətləri uzlaşan iki media quruluşu var. Bunlardan biri Türkiyədəki erməni mətbuatı, digəri isə Doğana məxsus KİV-lərdir. "Doğan Media Qrupu"nda erməni mənşəli Türkiyə vətəndaşlarının və eyni zamanda gizli ermənilərin olması, həmçinin Aydın Doğanın mübahisəli etnik kimliyi, erməni mənşəli olması barədə yayılmış məlumatlar da onun anti-Türkiyə və anti-Azərbaycan fəaliyyətini səciyyələndirən amillər sırasında göstərilir. 2009-cu ildə Türkiyə ilə Ermənistan arasında sərhədlərin açılması məsələsinin müzakirəyə çıxarıldığı zaman da Doğan mediası Azərbaycanın kölgəsini qılınclamaqla məşğul olub. Bu materiallarla yaxından tanış olmaq üçün o dövrün mətbuatına göz gəzdirmək kifayətdir.

Ötən il ilin sonlarında Azərbaycan Ordusu tərəfindən Ermənistan hərbi-hava qüvvələrinə məxsus döyüş helikopterinin məhv edilməsi "CNN Türk" efirindən "Azərbaycan Dağlıq Qarabağa aid savaş helikopterini düşürdü" başlığı ilə verilmişdi, bununla da qondarma "Dağlıq Qarabağ rejimi" münaqişədə tərəf kimi təqdim olunmuşdu. Aydın Doğana məxsus olan "Radikal" qəzeti Türkiyə ermənilərinin ən çox əməkdaşlıq etdiyi qəzetlərdən biridir. "Radikal" qəzetinin erməni əsilli əməkdaşı Arıs Nalçı 2014-cü il 25 oktyabr tarixli "Kobaniyi Qarabağdan anlamaq" başlıqlı köşə yazısında Qarabağın işğal edilməsinə haqq qazandırılır, erməni işğalı "milli-azadlıq mübarizəsi" kimi təqdim edilir. Doğana məxsus "Hürriyyət" qəzeti isə Azərbaycana qarşı davamlı şəkildə gözdənsalma kampaniyası həyata keçirən media orqanlarınıdır. Təsadüfi deyil ki, bu qəzetin əməkdaşı, A.Doğana yaxınlığı ilə tanınan jurnalist Tolqa Tanış Qərbin xüsusi xidmət orqanları tərəfindən idarə olunan OCCRP adlı jurnalist qurumunun üzvlərindən biridir. O, bu qurumun Azərbaycana qarşı həyata keçirdiyi qara piar kampaniyasında fəal iştirakı ilə seçilir. "Doğan Media Qrupu" Azərbaycanda insan hüquqları, demokratiyanın durumu və digər mövzular haqqında çoxsaylı qeyri-obyektiv və qərəzli materiallar yaymaqla, həmçinin Ermənistan-Azərbaycan, Dağlıq Qarabağ münaqişəsi ilə bağlı Azərbaycanın haqlı mövqeyini təhrif edərək ictimai rəyi Ermənistanın lehinə yönəltməyə çalışır.

Görünür, bu münasibətin arxasında onun hamıya yaxşı tanış olan Fətullah Gülənin başçılıq etdiyi, Mərkəzi Kəşfiyyat İdarəsi ilə sıx bağlı olan nurçular qrupu ilə son zamanlar yaranan müttəfiqliyi də dayanır. Azərbaycanda Türkiyə hakimiyyətinə dəstək məqsədilə gülənçi şəbəkənin ifşa olunması, türk liseylərinin qapadılması hazırda F.Gülən tərəfdarları ilə A.Doğanın birgə Azərbaycana qarşı kampaniya həyata keçirməsini şərtləndirir. Gülənçi-Doğançı şəbəkə Azərbaycan-Türkiyə birliyini hədəfə götürməklə öz antimilli, ermənipərəst simasını açıq aydın-göstərir. Belə olduğu halda gülənçi şəbəkə Azərbaycandakı biznesindən, media strukturlarından, Qafqaz Universitetinin fəaliyyətindən narahat olmalıdır. Doğançılar da öz mediasının Azərbaycan ictimai rəyinə təsir imkanlarının itirilməsi, Azərspace-də onların yayımının dayandırılması təhlükəsi ilə üz-üzə qala bilərlər.

Son olaraq onu qeyd etmək yerinə düşər ki, A.Doğan kimi erməni mənşəli həm də, gülənçilərin hansı qərəzli mövqe sərgiləmələrindən asılı olamayaraq qardaşlığı tarixi köklərə söykənən, eyni millətə, eyni dilə, eyni dilə, eyni dinə sahib olan Türkiyə və Azərbaycan bir - birinə dəstək və arxa olublar və bu prinsip də heç zaman dəyişməyəcək. Qısa desək, anti-Türkiyə və anti-Azərbaycan dairələrin fikirləri ancaq boşboğazlıqdan başqa bir şey olmayacaq.// sia.az