Bu gün Bakı Dövlət Universitetinin rektoru, akademik Abel Məhərrəmov Gürcüstan Elmlər Akademiyasının akademik katibi Givi Tsintsadzeni qəbul edib.
BDU-nun Mətbuat və İnformasiya şöbəsinin rəhbəri Pərvanə İbrahimovanın AZXEBER.COM-a verdiyi məlumata görə, rektor əvvəlcə Azərbaycan və Gürcüstan arasındakı dostluq və qardaşlıq münasibətlərindən danışıb, bu əlaqələrin ümummilli lider Heydər Əliyevin dövründə mökəmləndiyini və bu gün Prezident İlham Əliyevin siyasəti nəticəsində daha da inkişaf etdiyini vurğulayıb. Akademik BDU-nun tarixi və bu günü barədə məlumat verərək, ölkələr arasında təhsil və elm sahəsindəki əməkdaşlığın önəmli olduğunu nəzərə çatdırıb, universitetdə kimya elminin inkişafına xüsusi önəm verildiyini bildirib.
Givi Tsintsadze Azərbaycan alimləri ilə ötən əsrin 50-ci illərindən başlamış və bu günə qədər davam edən əlaqələrdən danışıb. Qonaq Gürcüstan universitetləri və onların ölkədə kimya elminin inkişafına verdiyi töhfələrdən bəhs edib.
Görüşdə BDU və Gürcüstan kimyaçıları arasında əməkdaşlığın perspektivləri müzakirə edilib.
Qonaq Heydər Əliyev Muzeyində, BDU-nun laboratoriya və elmi-tədqiqat mərkəzlərində olub.
Givi Tsintsadze - görkəmli alim, müəllim və elm təşkilatçısı, kimya elmləri doktoru, professor, Gürcüstan Elmlər Akademiyasının akademiki, Gürcüstan və Ukrayna Dövlət mükafatı laureatıdır. O, 550 monoqrafiya, dərslik və patent müəllifidir.
