Siyasi partiya rəhbərləri, KİV və ictimaiyyət nümayəndələri, hüquq müdafiəçiləri və diplomatik korpus təmsilçiləri bu gün Qurd qapısındakı məzarlıqda Elmar Hüseynovu anıblar.
Elmar Hüseynov 2005-ci ildə Bakıda, yaşadığı evin blokunda odlu silahla qətlə yetirilib. İstintaqı Milli Təhlükəsizlik Nazirliyi aparır.
Ziyarətçilər arasında Müsavat başqanı İsa Qəmbər, AXCP sədri Əli Kərimli, ABŞ və Britaniya səfirliklərinin nümayəndələri, “Qanun” jurnalının baş redaktoru Şahbaz Xuduoğlu, “Yeni Müsavat” qəzetinin baş redaktoru Rauf Arifoğlu, “Bizim yol” qəzetinin baş redaktoru Bahəddin Həziyev, Reportyorların Azadlıq və Təhlükəsizlik İnstitutunun direktoru Emin Hüseynov, “Zerkalo” qəzetinin baş redaktoru Elçin Şıxlı, “Yeni Nəsil” jurnalistlər Birliyinin sədri Arif Əliyev, Demokratik Jurnalistlər Liqasının sədri Yadigar Məmmədli, “Turan” İnformasiya Agentliyinin direktoru Mehman Əliyev, hüquq müdafiəçiləri Leyla Yunus, Novella Cəfəroğlu, Səidə Qocamanlı və sair tanınmış şəxslər olub. Çıxış edənlər qatillərinin tapılmasını, cəzalandırılmasını tələb ediblər.
Elmar Hüseynovun atası Sabir Hüseynov çıxışında oğlunun qatillərinin bir gün mütləq layiq olduqları cəzanı alacağına əmin olduğunu bildirib.
