Hacıbəy Heydərli: Azərbaycan mediasına qarşı aparılan qara piarın qarşısı effektiv şəkildə alınır

META ("Facebook” və "Instagram”) şirkəti 2025-ci ilin ilk rübünə dair "Adversarial Threat” adlı hesabatını yayımlayıb.

Hesabatda bildirilir ki, İranda yaradılmış və koordinasiyalı şəkildə idarə olunan saxta profillər və səhifələr müəyyən edilərək platformalardan silinib. Ümumilikdə 60 saxta hesab ləğv olunub: 17 "Facebook” profili, 22 "Facebook” səhifəsi və 21 "Instagram” hesabı.

Bu səhifələr Azərbaycan dilində fəaliyyət göstərib və əsas hədəf kütləsi Azərbaycan və Türkiyə auditoriyası olub. META həmin hesabların silinməsi üçün onların digər sosial şəbəkələrdəki fəaliyyətini də araşdırıb.

Araşdırma zamanı məlum olub ki, bu səhifələr populyarlıq görüntüsü yaratmaq məqsədilə saxta izləyicilərdən və süni rəylərdən istifadə ediblər.
İran Prezidentinin Azərbaycana səfəri zamanı bu profillərin xüsusi fəallıq göstərməsi və şərhlərin oxşar məzmunlu olması onların koordinasiyalı şəkildə idarə edildiyini göstərib. Bu profillərlə bağlı Azərbaycan Respublikasının Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidməti (ETX) vasitəsilə META-ya rəsmi şikayət göndərilib.

Hesabatda konkret hesab adları açıqlanmasa da, onların ETX-nin müraciəti əsasında silindiyi qeyd olunur. Qeyd olunan fəaliyyətlərlə bağlı monitorinqlər davam etdirilir və son bir ay ərzində İranla yanaşı, Rusiyadan idarə olunan və Azərbaycanı hədəfə alan dörd iri xəbər səhifəsinin də bağlanmasına nail olunub.

Azxəbər.com informasiya portalının baş redaktoru, Mətbuat Şurası İdarə Heyətinin üzvü Hacıbəy Heydərli Sherg.az-a deyib ki, Azərbaycan mediasına və sosial şəbəkələrə qarşı hücumlar daim olub:

"Ölkəmizə qarşı hər zaman məqsədli şəkildə dezinformasiya və "feyk nyus" kampaniyaları aparılıb. Hətta sosial şəbəkələrdə saxta hesablar yaradılaraq qara piar fəaliyyəti həyata keçirilib. Xüsusilə Vətən müharibəsi dövründə bu cür halların açıq şahidi olduq. İran-Azərbaycan münasibətlərinin gərginləşdiyi vaxtlarda İrandan, o cümlədən Ermənistandan və hətta Rusiyadan Azərbaycan sosial media məkanına hücumlar təşkil olunub. Saxta profillər əvvəlcə Azərbaycanla, şəhid ailələri ilə bağlı həssas mövzularda paylaşımlar edərək izləyici toplayır, ardınca isə antiAzərbaycan mövqedən çıxış edib yalan və təxribat xarakterli məlumatlar yayırdılar. Bu baxımdan META şirkətinin hesabat yayımlayaraq ölkəmizə qarşı istifadə olunan saxta hesab və səhifələri silməsi müsbət haldır. Belə addımlar Azərbaycanın informasiya təhlükəsizliyi baxımından əhəmiyyətlidir".

Ekspert əlavə edib ki, bu gün Azərbaycanın dövlət qurumlarının META, TikTok və digər sosial şəbəkə platformaları ilə sıx əməkdaşlıq münasibətləri qurmaları sevindiricidir:

"Əvvəllər ölkəmizin müraciətlərinə biganə yanaşan platformalar indi Azərbaycanla əməkdaşlığa önəm verirlər. Bu da bir daha Azərbaycanın beynəlxalq informasiya müstəvisində artan nüfuzunu və gücünü göstərir. Hazırda isə sosial şəbəkələrdə Azərbaycan mediasına qarşı aparılan qara piarın qarşısı effektiv şəkildə alınır".