Dekabrın 10-da İstanbulda “24-cü Best Model of the World” yarışması keçiriləcək. ANS PRESS-in məlumatına görə, Erkan Özermanın rəhbəri olduğu yarışmada 90 ölkənin manikenləri birincilik uğrunda mübarizə aparacaq. Münsiflər heyətinin tərkibində təmsil olunacaq nüfuzlu şəxslər arasında Türkiyədə yaşayan “23-cü Vitse-Best Model” olmuş azərbaycanlı model Gunay Musayevanın da adı var. Bu barədə ANS PRESS-ə Günayın İstanbulda yaşayan mətbuat katibi Ülvi Hadıyev məlumat verib: “Çox mötəbər bir yarışın olacağını söyləmək olar. Günay xanım da münsif kimi öz işinə daha məsuliyyətli yanaşır. Həm də dunya ikincisi kimi qazandığı tacı budəfəki qalibə özü təhvil verəcək”. Mübarizənin gərgin olacagını proqnozlaşdıran Günaya Erkan bəy final öncəsi xüsisi hədiyyə də hazırlayib. Belə ki, həmyerlimizin yarışma üçün çəkdirdiyi fotolar “Best Model of the World-2011” jurnalının üz qabığında dərc olunub. Bu kataloqda 90 ölkəni təmsil edəcək finalçılar haqqında məlumat verilir. Final dekabrın 10-da Bakı vaxtı ilə saat 23.00-da Türkiyənin “Fashion One” telekanalı ilə canlı yayımlanacaq. Günaydan olan yeniliklər bununla bitmir. Mətbuat katibi deyir ki, xanım Musayeva 14 dekabrda Türkiyənin tanınmış gənc modelyeri Tolqa Çamın “Dream Of The Dresses” adını daşıyan dəfiləsində baş maniken kimi podiuma çıxacaq. “Mustafa Kemal Kültür Merkezi”nde baş tutacaq moda nümayişində Günayla yanaşı Türkiyənin lider modelləri Ece Gürsel, Tuba Karaca, Nihan Andaç, Merve Büyüksaraç, Ebru Ürün, Simge Tertemiz, Şehnaz Özkaya, Tuğçe Dural, Yelda Kara, Eda Sedalı, Alaz Köprüvalı və Sevcihan Tunca podiuma çıxacaq. Rəqibsiz modellərin qatılacağı moda nümayişində Günayın baş maniken seçilməsi təsadüfi deyil. Bu günlərdə Günay Tolqa Çamın yeni kolleksiyasının tanıtımı üçün xüsusi fotosessiya etdirib. Türkiyənin oxunaqlı moda jurnallarından biri üçün fotoqrafların kameraları qarşısına keçən həmyerlimiz hamilə olmasına baxmayaraq, 4 saata yaxın çəkiliş meydançasında pozalar verib. Modelyerin yeni kolleksiya təqdimatına gəlincə isə xeyriyyə məqsədi daşıyan tədbirdən əldə olunacaq vəsait Vanda baş vermiş zəlzələdən ziyan çəkmiş uşaqlar üçün xərclənəcək.
