İbrahim Mehdiyev: “Yalan danışırlar, bizə şər atırlar, böhtan yazırlar”
Bakının “Sovetski” adlanan ərazisində evlərini müəyyən edilmiş şərtlərlə sökülməsilə razılaşmayan sakinlərin mənzillərinin söküntüsünə başlanılıb. Xəbər saytlarının yazdığında görə, Yasamal rayon İcra Hakimiyyətinin başçısı İbrahim Mehdiyevin tapşırığı ilə sözü gedən yerdə söküntü işlərinə ağır texnikalar cəlb edilib. Ərazidə olan icra başçısı narazı olan sakinlərin polisə aparılması tapşırığını verib.
Yasamal rayon 26-cı Polis bölməsinin əməkdaşları texnikaların qarşısını kəsən 6 qadını bölməyə aparıblar. Qadınların biri qışqıraraq, körpə uşağın evdə yatdığını bildirib. Yalvarıb ki, buldozerə verilən evindən heç olmasa, uşağı çıxarsınlar.
Editor.az yayılan məlumatlara aydınlıq gətirmək üçün Yasamal rayon İcra Hakimiyyətinin başçısı İbrahim Mehdiyevlə əlaqə saxlayıb.
Portalımıza açıqlamasında icra başçısı yayılan məlumatları saxta adlandırıb: “Mən hazırda “Sovetski”də, hadisə yerindəyəm. Hər şey öz qaydasındadır. Heç kim həbs olunmayıb, heç kimə qarşı təzyiq edilməyib. Hansı uşağı buldozaerə vermişik, adını desinlər də?!. Adını niyə demirlər, niyə yalan danışırlar. Bu biz qarşı kampaniyadır, bizə şər atırlar, böhtan yazırlar”.
