Son günlərin müzakirə predmetlərindən biri də rus dilində təhsilin ləğv olunmasıdır.
Sosial şəbəkələrdə ciddi müzakirə olunan mövzuya yanaşmalar da fərqlidir.
İstifadəçilərin bir qismi rus dilində təhsilin ləğv olunmasının tərəfdarı olsalar da, bir qismi bunun əleyhinə çıxır.
Bəs, ibtidai siniflərdə rusdilli təhsil ləğv olunmalıdırmı?
Məsələ ilə bağlı AZXEBER.COM-a açıqlama verən siyasi şərhçi, əməkdar jurnalist Azər Həsrət rus dilində təhsilin ləğv olunması ilə bağlı bunları deyib:
"İbtidai sinifdə təhsil almaq müddəti gələcəkdə uşağın formalaşmasında mühüm rol oynayır. Əlbəttə ki, həmin dövrdə uşaqlara aşılanan istənilən bilik, bacarıq, tərbiyə, əxlaq onun sabahını müəyyənləşdirir. Uşağa nəyin, nə zaman öyrədilməsinə diqqət edilməlidir. Yəni uşaqlara ibtidai təhsil dövründən başlayaraq xarici dil öyrədilməyə başlanılırsa, demək olar ki, həmin uşaqların öz milli kökündən məsafəli davranması üçün təməl qoyulur. Uşaq nə qədər gec xarici dil oyrənməyə başlayarsa, bir o qədər öz milli kimliyinə bağlı qalmış olar. Uşaq ailəsində, məktəbdə öz ana dilində danışmalı və təhsil almalıdır. Bu ardıcıllığı 4-cü sinifi bitirənə qədər belə saxlamaq vacibdir. Bundan sonra uşaqlara xarici dilləri öyrətmək olar".
Azər Həsrət həmçinin uşaqların xarici dildə təhsil almasında valideynləri də günahlandırıb:
"Bu gün elə valideynlər var ki, ailənin içində körpə uşağı ilə rus dilində danışmaqla yanaşı, uşağını rus məktəbinə qoyur. Nəticədə uşaq böyüdükcə Azərbaycan dilindən uzaqlaşır və mənəvi cəhətdən şikəst olaraq böyüyür. Daha sonra uşaqlarının cəmiyyətdə özünü realizə edə bilməmələrindən şikayətlənirlər. Kimdir günahkar? Əlbəttə ki, övladını öz dövlətinin, millətinin deyil əcnəbi bir millətin dilinə alışdıranlardır. Buna görə də dövlət qərar qəbul etməli, ibtidai təhslilin xarici dillərdə olması qadağan edilməlidir. Yalnız rus millətindən olan, milli azlıq və etnik qrupların övladları öz ana dilində tədris almalıdırlar. Rus dili heç də düşünülən qədər üstün dil deyil. Bəzən deyirlər ki, dünyaya çıxmaq üçün rus dili bilmək lazımdır. Sual yaranır, belə qayda harda var? Rus dili Rusiya bazarlarından başqa heç bir yerdə işə yaramır".
Əməkdar jurnalist hesab edir ki, rusların özləri belə rus dilinin qayğısına bizim qədər qalmırlar:
"Əgər vətəndaşlarımız uşaqlarını gələcəkdə Rusiya bazarları üçün hazırlayırsa, o zaman övladlarını rus dilində oxutsunlar. Onların gedə biləcəyi ən yüksək yer oradır. Dünyaya çıxmaq üçün yalnız ingilis dili bilmək kifayət edir. Etiraf edək ki, bu gün rus dili lazımsız dilə çevrilib. Lazımsız dilin yaşadılmasında Azərbaycanlılar niyə iştirak edir? Niyə ölüyə nəfəsi biz veririk? Rusların özləri belə rus dilinin qayğısına bizim qədər qalmırlar. Öz qatilinə bu qədər bağlı olan bir millət yer üzündə bəlkə də yoxdur. Rusiya bizi işğal edib, bizə soyqırımlar yaşadıb. Düşünürəm ki, artıq millət özünə dönməlidir, ağıllanmaq lazımdır. Bu elə bir millətin dilidir ki, havada uçan sərnişin təyyarəmizi amansızcasına vurub, yerə salan bir millətin dilidir. Biz özümüzü tarixi bizim tariximizin 10 faizi qədər olmayan millətin ayağına verməyək".
A.Həsrət işə qəbul zamanı rus dilinin tələb olunmasını boş manipulyasiya adlandırıb:
"Azərbaycanda iş yerlərində rus dilinin tələb olunması haqda deyilənlər boş manipulyasiyadan başqa heç nə deyil. Hətta adamlara rast gəlirik ki, guya hansısa dükanda satıcı işinə götürüləndə rus dilini bilib-bilməməsini soruşurlarmış. Bunlar cəfəng bir şeydir. Bəli, müəyyən xidmət sahələri var ki, orada rus dili ilə yanaşı, ingilis dili və başqa dillər tələb olunur. Bunu anlayışla qəbul edirəm. Ancaq deyə bilərəm ki, Azərbaycanda işə qəbul zamanı heç kimdən, xarici dil bilgisi tələb olunmur".
Günel Hüseynli
