"Hədəfim daimi olaraq milli komandada çıxış etməkdir” - AÇIQLAMA

İDMAN

16:40 17.10.2023

292

"Hədəfim daimi olaraq milli komandada çıxış etməkdir”.

Bu sözləri AZXEBER.COM-a açıqlamasında Azərbaycan millisinin və "Qəbələ" klubunun qapıçısı Rəşad Əzizli deyib. O millinin son oyunlarını belə dəyərləndirib.

"Bildiyiniz kimi millimiz səfərdə Estoniya üzərində 2:0 hesabla qalib gəldi. Oyun çox yaxşı keçdi, səfərdə oynamaq elə də asan deyil, çünki rəqibin gücü və rəqib meydandan azarkeş amili var. Amma istədiyimiz nəticəni əldə etdik. Ötən gün doğma meydanda isə güclü Avstriya millisi ilə oynadıq, təəsüf ki, minimal hesabla məğlub olduq. Buna baxmayaraq pis çıxış etmədik, fürsətlərdən istifadə edə bilsəydik oyundan nəticə ilə ayrılacaqdıq. Amma ümidimizi itirmirik, millimiz inkişaf edir, qarşıda oyunlar var, istəyirik xallar toplayıb reytinqdə daha üst pillələrdə qərarlaşmaqdır”.

Təcrübəli futbolçu Azərbaycan - Avstriya matçına azarkeşlərin marağının az olmasından danışıb:

"Oyun bizə doğma məkanda, Tofiq Bəhramov adına Respublika Stadionunda baş tutdu. Bu stadion hər bir futbol azarkeşinə doğmadır, bununla yanaşı şəhərin mərkəzində yerləşir. Ona görə hər birimiz istəyirik ki, stadiona çox adam gəlsin, anşlaq yaratsınlar. Təəsüf ki, arenada azarkeş sayı az idi. İnşallah gələn ay İsveçlə bu stadionda üz-üzə gələcəyik. Çox istəyirəm ki, stadion tam dolsun. Elə olanda bütün futbolçularda ruh yüksəkliyi yaranır, azarkeş dəstəyi tamam başqa hisslərdir. İnanıram ki, azarkeşlərimiz qarşıdakı oyunlarda bizi tək buraxmayacaqlar”.

29 yaşlı qapıçı uzun müddət sonra milliyə dəvət almasından danışıb:

"Neçə ildir ki, millidə şans almağa hazıram. Bu günü çoxdan gözləyirdim, baş məşqçiyə təşəkkür edirəm ki, məni dəvət etdi. Klubumda maksimum dərəcədə yaxşı çıxış etməyə çalışıram, eyni zamanda öz üzərimdə çalışıram ki, həmişə yaxşı formada olum. Hədəfim daimi olaraq milli komandada çıxış etməkdir”.

Rəşad Əzizli klubu haqda bunları deyib:

"Artıq bu gündən klubda məşqləri bərpa etdik. Hər şey qaydasındadır, komanda şəklində çempionat oyunlarına hazırlaşırıq. Təəsüf ki, son sıralarda yer almışıq. Amma ikinci dövrədə maksimum çalışaraq xallar toplayıb üst pillələrdə yer almaq istəyirik. Komandamın potensialı var, sadəcə qələbələr lazımdır ki, hər şey yoluna düşsün. Gələn tur evdə "Araz-Naxçıvan"la qarşılaşacağıq, həmin oyunda da məqsədimiz yalnız qələbə olacaq”.