Azərbaycan Təhsil İşçiləri Azad Həmkarlar İttifaqı fəaliyyətini artıq Elm və Təhsil İşçiləri Həmkarlar İttifaqı (ETİHİ) adı ilə davam etdirəcək.
AZXEBER.COM xəbər verir ki, bu dəyişiklik elm sahəsində fəaliyyət göstərən təhsil müəssisələrinin, elmi-tədqiqat institutlarının, laboratoriyaların və elm yönümlü ali təhsil qurumlarının əməkdaşlarının təşkilatımızın fəal üzvləri olması faktını rəsmi və təşkilati baxımdan daha dəqiq ifadə etmək məqsədi daşıyır.
Yeni ad elm və təhsil sahəsində çalışan əməkdaşların maraqlarını bir araya gətirən, onları daha geniş şəkildə əhatə edən yanaşmanı əks etdirir.
Elm və təhsil bir-birindən ayrılmaz sahələrdir. Bu iki sahənin ortaq dəyərləri üzərində möhkəm həmrəylik platforması quraraq, əməkdaşların hüquq və maraqlarının qorunmasına yönəlmiş fəaliyyəti daha da gücləndirir.
Elm və Təhsil İşçiləri Həmkarlar İttifaqı üzvlərin yanında olmağa, onların əmək hüquqlarını, sosial təminatlarını və peşəkar maraqlarını qorumağa, birgə təşəbbüslərlə yeni və uğurlu addımlar atmağa davam edəcək.
