"Azərbaycan ermənilərin ölkəmizə qarşı "humanitar müharibəsi”ni də iflasa uğratdı. Nəticədə ermənilərin humanitar fəlakətlə üzləşdikləri ilə bağlı dünyanı aldatmaq cəhdləri də baş tutmadı”.
Bunu APA-ya açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədr müavini Hikmət Babaoğlu bildirib.
Hikmət Babaoğlu deyib ki, Azərbaycanın istədiyi Xankəndi-Ağdam yolunun açılması ilə bağlı razılıq əldə edilib:
"Ağdam marşrutunun açılması artıq həll olunub. Sabah Rusiya Qızıl Xaç Cəmiyyətinin yük maşınının Ağdama, oradan isə Əsgərana daxil olması təmin ediləcək. Beləliklə, artıq bu marşrutla malların və yüklərin daşınması üçün yeni reallıq yarandı. Üstəlik, bir daha hamıya aydın oldu ki, Azərbaycan ərazisinə istənilən təyinatlı yük və yaxud yardım yalnız və yalnız Azərbaycanın icazəsi və onun təklif etdiyi marşrutla mümkündür. Yəni Azərbaycan icazə versə, eyni vaxtda Laçın yolu ilə də müxtəlif təyinatlı yük və mallar daşına bilər ki, bu da Azərbaycan qanunlarının icazə verdiyi formada mümkün ola bilər. Şübhəsiz ki, bu, nəzarət buraxılış və gömrük nəzarətindən keçməklə mümkündür”.
Deputat qeyd edib ki, ermənilərin və onları dəstəkləyən bir çox dövlətlərin Xankəndi-Ağdam yolunun açılmasına qarşı olan mövqeləri sıradan çıxarıldı:
"Bu, ermənilər və onların hamiləri üçün bir siyasi-psixoloji əzilmə nöqtəsi idi. Ancaq bu heç də o demək deyil ki, Ermənistan tərəfindən maliyyələşdirilən və hələ də fəaliyyət göstərən qondarma rejimin dərhal özünü buraxması ilə bağlı Azərbaycanın tələbləri qüvvədən düşdü. Əsla belə deyil. Ən qısa zamanda Qarabağ iqtisadi rayonunda olan qondarma rejim özünü buraxmalı, qeyri-qanuni erməni silahlı birləşmələri ölkəmizi tərk etməli, Azərbaycanın suveren hüquqları və qanunları Qarabağda tətbiq edilməlidir. Elə növbəti addım da bu olacaq”.
