Ötən gün elektrik yarımstansiyasında baş vermiş yanğın nəticəsində elektrik enerjisinin kəsilməsinə görə müvəqqəti bağlanan Avropanın ən böyük aeroportu - Londonun Hitrou hava limanı bu gündən fəaliyyətini tam bərpa edib.
Bəzi reyslər dünən axşamdan bərpa edilib, lakin dünyanın ən işlək beşinci hava limanına təsir edən nasazlıq xaosa səbəb olub. Belə ki, aviaşirkətlər təyyarələri və ekipajları bazalara qaytarmaq üçün çalışdıqları zaman onminlərlə sərnişin qalmaq üçün boş hotel nömrələri və ya alternativ marşrutlar axtarmağa məcbur olub.
Hitrounun nümayəndəsi bildirib ki, nasazlıqdan əziyyət çəkən sərnişinlərə kömək etmək üçün hava limanında əlavə briqadalar işləyir.
"Terminallarda yüzlərlə əlavə əməkdaş yerləşdirilib, uçuşlar cədvəlinə isə əlavə 10 min sərnişinin daşınması üçün əlavə reyslər salınıb”, - o bildirib.
Qeyd edək ki, martın 22-nə Hitrouda ümumi sərnişin axını 291 min nəfərə çatan 1 351 reys planlaşdırılırdı. Amma nasazlığa görə bəzi reyslər digər Britaniya və Avropa hava limanlarına yönləndirilib.
Beynəlxalq Hava Nəqliyyatı Assosiasiyasının (IATA) rəhbəri Villi Uolş vəziyyəti hava limanının planlaşdırmadakı açıq-aşkar uğursuzluğu kimi qiymətləndirib.
Böyük Britaniya hökuməti hava məkanına təzyiqi azaltmaq üçün gecə uçuşlarına qoyulan məhdudiyyətləri müvəqqəti olaraq aradan qaldırıb. Amma "British Airways”in baş icraçı direktoru Şon Doyl bildirib ki, nasazlıq yaxın günlərdə bütün müştərilərə ciddi təsir göstərəcək.
Aviasiya mütəxəssisləri qeyd edirlər ki, Avropa hava limanlarında belə irimiqyaslı fasilələr sonuncu dəfə 2010-cu ildə - İslandiyada vulkan püskürməsi zamanı 100 minə yaxın reysin təxirə salındığı zaman baş vermişdi.
Böhran fonunda Hitrou bölgəsində hotel qiymətləri kəskin yüksəlib. Belə ki, nömrələr standart qiymətdən beş dəfə çox qiymətə - 500 funt sterlinqə (645 ABŞ dolları) təklif edilib.
Qeyd edək ki, Hitrou son illərdə artıq ciddi pozuntularla üzləşmişdi. 2023-cü ildə avtomatlaşdırılmış çıxış qapılarında və hava hərəkətinə nəzarət sistemlərində nasazlıq baş vermişdi.
///report
