Hörmüz boğazından keçməyə çalışan iki neft tankeri dəniz minalarına düşərək yanmağa başlayıb.
Bu barədə İran İslam İnqilabı Keşikçiləri Korpusunun (SEPAH) "Telegram” kanalında məlumat yayılıb.
SEPAH-ın iddiasına görə, tankerlər naviqasiya və avtomatik identifikasiya sistemlərini söndürərək icazə verilməyən marşrutla Hörmüz boğazından keçməyə çalışıblar.
"Bir müddət əvvəl qanunsuz daşımalar həyata keçirən iki neft tankeri naviqasiya və avtomatik identifikasiya sistemlərini söndürərək icazəsiz marşrutla Hörmüz boğazından keçməyə cəhd edib. Nəticədə gəmilər dəniz minalarına düşüb, partlayışlar və yanğınlar baş verib”, – məlumatda qeyd olunub.
Tankerlərin hansı ölkələrə məxsus olduğu, heyət üzvlərinin vəziyyəti və hadisə nəticəsində mümkün itkilər barədə məlumat verilməyib.
SEPAH-ın açıqlamasındakı iddialar müstəqil mənbələr tərəfindən hələlik təsdiqlənməyib.
///apa.az
