İCMA nümayənədləri işgüzr İstanbul səfərində mühüm görüşlər keçirib.
AZXEBER.COM xəbər verir ki, İş Adamları Cəmiyyətinin Milli Assosiasiyasının (İCMA) "Tibb Müəssisələri və Həkimlərlə İş” komissiyasının İstanbul səfəri çərçivəsində bir sıra görüşlər və tədbirlər keçirilib.
28 sentyabr tarixində İstanbulda işgüzar səfərdə olan İCMA İdarə Heyətinin sədr müavini Bilal Qasımlı və "Tibb Müəssisələri və Həkimlərlə İş” komissiyasının üzvləri İstanbul Ticarət Universitetini ziyarət ediblər.
İstanbul Ticarət Universitetinin Ahi Çələbi Kampusunda keçirilən proqram çərçivəsində iştirakçılar üçün xüsusi təlim təşkil olunub. Tədbirin açılışını universitetin Prorektoru Prof. Dr. Hanifi Parlar edib. Ardınca Prof. Dr. Murat Kasımoğlu tərəfindən "Dünyadakı inkişaflar işığında Türk dünyasında və qlobal bazarlarda investisiya imkanları” mövzusunda təlim keçirilib.
Təlim zamanı qlobal bazarlarda baş verən dəyişikliklər, Türk dünyasında investisiya imkanları və beynəlxalq iqtisadi proseslərin biznes mühitinə təsiri ilə bağlı mövzular diqqət mərkəzində olub. Təlimin ardından iştirakçılar üçün nahar təşkil olunub və görüş qeyri-rəsmi fikir mübadiləsi ilə davam edib.
Təlimin sonunda İCMA-nın "Tibb Müəssisələri və Həkimlərlə İş” komissiyasının sədri Sevda Əlizadə tərəfindən Prof. Dr. Murat Kasımoğluna xatirə hədiyyəsi təqdim olunub.
Proqramın davamında İCMA nümayəndələri İstanbul Ticarət Universitetinin Sadabad (Sütlücə) Kampusunda rektorluqla görüş keçirib və kampusla tanış olublar. Görüş zamanı universitetin rektoru Prof. Dr. Nəcip Şimşek tərəfindən iştirakçılara sertifikatlar təqdim edilib.
Universitetdə keçirilən proqramın yekununda İCMA ilə İstanbul Ticarət Universiteti arasında qarşılıqlı xatirə hədiyyələri təqdim olunub. Xatirə hədiyyələrini İCMA İdarə Heyətinin sədr müavini Bilal Qasımlı və "Tibb Müəssisələri və Həkimlərlə İş” komissiyasının sədri Sevda Əlizadə təqdim ediblər.
İşgüzar səfər çərçivəsində İCMA nümayəndələri İstanbul Ticarət Odasını da ziyarət ediblər. İTO-nun Baş katibi Prof. Dr. Nihat Alayoğlu ilə keçirilən görüşdə qarşılıqlı tanışlıq baş tutub, iki ölkənin işgüzar dairələri arasında əlaqələrin inkişafı və mümkün əməkdaşlıq istiqamətləri ətrafında fikir mübadiləsi aparılıb.
Görüş zamanı tərəflər arasında gələcək əməkdaşlıq imkanlarının müzakirəsi ilə yanaşı, qarşılıqlı xatirə hədiyyələri də təqdim olunub.
İCMA-nın İstanbul səfəri çərçivəsində keçirilən görüş və tədbirlər Azərbaycan və Türkiyə arasında işgüzar əlaqələrin inkişafına, yeni tanışlıqların qurulmasına, təcrübə və fikir mübadiləsinin genişləndirilməsinə, eləcə də gələcək əməkdaşlıq istiqamətlərinin müəyyənləşdirilməsinə yönəlib.
