İctimai Palatanın Fransa Senatında qondarma “erməni soyqırımı” haqqında qanunun müzakirəsi ilə bağlı bəyanat yayıb.AZXEBER.COM-un verdiyi məlumata görə, bəyanatda qeyd olunur ki, “erməni genosidi” deyilən hadisənin rəsmən tanınması və bunun inkar edilməsinə görə cəza müəyyən edilməsini nəzərdə tutan qanunun tələm-tələsik Senatda müzakirəyə çıxarılması Azərbaycan cəmiyyətində həyəcana və qəzəbə səbəb olub.Bəyanatda vurğulanır ki, XX əsrin sonu, XXI əsrin əvvəllərində ermənilər tərəfindən torpaqlarının önəmli bir hissəsi işğal olunmuş, 100 minlərlə insanı qanuni ərazilərindən etnik təmizləmə nəticəsində didərgin salınmış, 10 minlərlə mülki vətəndaşı qətlə yetirilmiş, əsrin faciələrindən olan Xocalı soyqırımına məruz qalmış Azərbaycan xalqı Fransa parlamentinin bu addımını başa düşmür, qəbul etmir və qətiyyətlə pisləyir. Ermənilərin öz qonşularına qarşı haqsız iddiaları 3 əsrdir ki, regionda xalqlar arasında mehribançılıq, dinc yanaşı yaşamaq, milli tolerantlıq münasibətlərinin formalaşması, təminatlı təhlükəsizlik üçün təhdid, münaqişə, düşmənçilik mənbəyidir. Erməni iddialarının sonu görünmür və regionda elə bir xalq, dövlət yoxdur ki, bu haqsız və əsassız iddialardan zərər çəkməsin: “Dünya və region dövlətləri tarixən yaranmış konfliktlərin nizama salınması üçün böyük səylər göstərdiyi, kompromislər, həll yolları aradığı bir zamanda Fransa parlamentində müzakirəyə çıxarılan qanun layihəsi münaqişəni körükləməklə, təcavüzkarın şirnikləndirilməsinə xidmət etməklə beynəlxalq provokasiya rolu oynayır. Biz heç cür qəbul etmirik ki, dünyaya müasir azadlıq mədəniyyətini bəyan etmiş Fransada tarixi bir hadisəyə münasibətdə müstəqil fikrə malik olmaq, elmi araşdırma aparmaq hüququna qadağan qoyulur, düşüncə, ifadə azadlığına görə cəza müəyyən edilir. Əsas insan hüquq və azadlıqları haqqında beynəlxalq öhdəliklərə zidd olan bu mürtəce akt Böyük Fransa inqilabının devirdiyi orta əsr zülmətinə qayıtmaqdır”.İctimai Palata hesab edir ki, yaranmış vəziyyət yalnız Türkiyəyə qarşı yox, regionun bütün xalqlarına, özəlliklə müsəlman və türk xalqlarına qarşı yönəlib və buna adekvat münasibət göstərilməlidir. Azərbaycan hər zaman qardaş və strateji müttəfiqi olan Türkiyə xalqının və dövlətinin yanındadır və yanında olacaq: “İctimai Palata Azərbaycan – Türkiyə Strateji Əməkdaşlıq Şurasının təcili ən yüksək səviyyədə toplanıb vəziyyətlə bağlı birgə qərarlar qəbul edib, hərəkətlərinin müəyyənləşdirilməsinin zəruriliyi haqqında təklifini bir daha xatırladır”.
