“İlham Əliyevin yenidən ölkə prezidentliyinə namizəd kimi irəli sürülməsi Azərbaycanda sabitliyi pozmaq, ölkəni dünya hegemonlarının nəzarətinə vermək istəyən qüvvələrə ən layiqli cavab oldu”. Bu sözləri “İslahatçı Gənclər” İctimai Birliyinin(İB) sədri Fərid Şahbazlı Yeni Azərbaycan Partiyasının V qurultayında İlham Əliyevin yenidən Azərbaycan prezidentliyinə namizəd kimi irəli sürülməsi ilə bağlı danışarkən deyib.
Onun sözlərinə görə, sürətlə inkişaf edən, dünyanın önəmli ölkələrindən birinə çevrilən Azərbaycanın qazandığı hər bir uğur İlham Əliyevin konkret hədəflərə hesablanan siyasətinin nəticəsidir: “Bu gün Azərbaycan gəncliyi cənab Prezidenti özünün ən böyük dostu hesab edir. Prezident davamlı olaraq gənclərin ölkənin ictimai-siyasi həyatında fəal iştirakını, onların sosial rifah halının yüksəldilməsini təmin etmək üçün konkret addımlar atır. Ölkəmizdə reallaşdırılan dövlət gənclər siyasətinin mahiyyətində Azərbaycan gəncliyini dövlətçiliyə bağlı və dünyada gedən rəqabət prosesinə tab gətirəcək səviyyədə intellektual bir qüvvə kimi görmək istəyi dayanır. Tam məsuliyyətlə demək olar ki, bu siyasət hər ötən gün daha çox öz əsas məqsədinə çatır. Lakin, çox təəssüf ki, ölkəmizdəki bəzi radikal dairələr müəyyən gənclər qruplarından siyasi kamikadze kimi istifadə edirlər. Ancaq unudurlar ki, gəncləri öz çirkin əməllərinə alət edənlər tarix qarşısında cavab verəcək”.
Fərid Şahbazlının sözlərinə görə, qarşıdan gələn seçkilərdə ölkə gəncliyinin mövqeyi qəti və aydındır: “Bizim yeganə namizədimiz İlham Əliyevdir və onun seçkilərdə qələbəsi həm də Azərbaycan gəncliyinin qələbəsi olacaq”.
“İslahatçı Gənclər” İctimai Birliyinin sədri eyni zamanda son günlər bir sıra müxalifət nümayəndələrinin Milli Şura adı altında birləşmək cəhdlərini də dəyərləndirib: “Mən bu məsələni hətta müzakirəyə layiq bilməyəcək qədər qeyri-ciddi hesab edirəm. Milli Şura və bu qəbildən olan təsisatları müxalifətin növbəti “evcik-evcik” oyunun davamı hesab edirəm. Müxalifətin bir sıra təmsilçilərinin də bəri başdan Milli Şuradan imtina etməsi də göstərir ki, bu qurumu da digərlər bu qəbildən olan təşkitların acı və uğursuz taleyi gözləyir”.
