İyunun 15-i Azərbaycanda dəniz mövsümü başlayıb.
İnsanların sərinləmək və əylənmək məqsədilə getdikləri çimərliklər hər il olduğu kimi bu il də itkisiz ötüşmür. Hər gün dənizdə boğulan şəxslər haqqında sosial şəbəkələrdə məlumatlar paylaşılır, bu hadisələrin ehtiyatsızlığa görə baş verdiyi qeyd edilir.
Bəs, çimərlik mövsümü başlayandan bu günə qədər neçə nəfər dənizdə batıb?
Məsələ ilə bağlı FHN-nin mətbuat xidmətindən AZXEBER.COM-a verilən məlumata görə, nəzarət altında olan çimərliklərdə ölüm halı yaşanmayıb:
"Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Dövlət Xidmətinin xilasediciləri tərəfindən iyun ayının 15-dən bu günə qədər 72 suda boğulma təhlükəsi ilə üzləşən şəxs xilas edilib. Xidmətin nəzarət etdiyi çimərliklərdə ölümlə nəticələnən suda batma hadisəsi qeydə alınmayıb”.
Qeyd edək ki, qadağan olunmuş ərazilərdə isə batma təhlükəsi ilə üzləşən insanların sayı az deyil. Son günlər mətbuatda dənizdə batma halları ilə bağlı xəbərlərin sayında artım müşahidə edilir. Onların bəziləri dənizin qadağan olunmuş hissəsində üzdükləri üçün, bəziləri təhlükəsizlik qaydalarına riayət etmədiyi üçün boğulurlar.
Ayşən
